Keshki jáne túngi ýaqytta jedel járdem shaqyrý tarıfi ósedi

ASTANA. KAZINFORM – Densaýlyq saqtaý mınıstriniń «Tegin medıtsınalyq kómektiń kepildik berilgen kólemi aıasynda jáne mindetti áleýmettik medıtsınalyq saqtandyrý júıesinde usynylatyn medıtsınalyq qyzmetterge tarıfterdi bekitý týraly» buıryǵyna ózgerister engizilmek. Qujat jobasy Ashyq NQA portalynda jarııalandy.

- Medıtsınalyq-sanıtarlyq alǵashyq kómek uıymdarynyń jumys ýaqytynan tys shaqyrýlarynyń 4 dárejeli shuǵyl jaǵdaılaryna ketken shyǵyndardy óteý tarıfter boıynsha tólenedi. Olar bir tirkelgen adamǵa 340 teńgeden 360 teńgege deıin ósedi. Bul qutqarý qyzmetteriniń resýrstaryn kúsheıtedi jáne azamattardyń júginýine jyldam jaýap berýge múmkindik beredi. Densaýlyq saqtaý mınıstrligi medıtsınalyq kómektiń qoljetimdiligi men sapasyn jaqsartýdy jalǵastyrýda. Tarıfterdi qaıta qaraý qutqarý qyzmetterine emhanalar jumys istemeıtin keshki jáne túngi ýaqytta qońyraýlardy jedel qyzmet kórsetýge múmkindik beredi, - delingen buıryq jobasynda.

Qujatqa sáıkes, ózgerister mynalarǵa baǵyttalǵan:

- qońyraýlarǵa jaýap berý jyldamdyǵyn arttyrý;
- patsıentterge kómek sapasyn jaqsartý;
- qutqarý brıgadalaryna artatyn júktemeni qoldaý.

- Osylaısha, tarıftiń kóterilýi qutqarý qyzmetiniń jumysyn tıimdirek etýge jáne árbir qazaqstandyq úshin medıtsınalyq kómekti qoljetimdirek jáne ýaqtylyraq etýge múmkindik beredi. Mınıstrlik jedel medıtsınalyq kómekti damytýdy jalǵastyrýda. Osylaısha árbir qońyraý kásibı qoldaýmen ýaqtyly qamtamasyz etiledi, - dep túsindiredi mınıstrlikten.

Buıryq jobasy 12 jeltoqsanǵa deıin qoǵamdyq talqylaýǵa shyǵarylyp otyr.
Buǵan deıin Densaýlyq saqtaý birinshi vıtse-mınıstri Tımýr Sultanǵazıev medıtsına qyzmetkerleriniń jalaqysyn kóterýge qatysty pikir bildirgen edi.