Keshendi testileý bastaldy - BǴM
ASTANA. 19 shilde. QazAqparat - Búgin respýblıkada keshendi testileý bastaldy. Keshendi testileý 35 testileý ótkizý pýnktteriniń bazasynda (bazalyq joǵary oqý oryndary) 23 shildege deıin ótkiziledi.
Bul týraly Bilim jáne ǵylym mınıstrliginiń baspasóz qyzmetinen habarlandy.
Keshendi testileýge qatysý úshin ótinishter qabyldaý 20 maýsym men 9 shilde aralyǵynda joǵary oqý oryndarynyń qabyldaý komıssııalarymen júrgizildi. 2013 jyl 9 shildede testileýge qatysýǵa ótinish bergenderdiń sany 78758-di qurady. Onyń ishinde jalpy orta bilim beretin mektep bitirýshileri 17765, oqýǵa jalpy orta bilimnen (11 synyptan) keıin túsken tehnıkalyq jáne kásiptik bilim berý uıymdarynyń bitirýshileri - 17568, oqýǵa negizgi orta bilimnen (9 synyptan) keıin túsken tehnıkalyq jáne kásiptik bilim berý uıymdarynyń bitirýshileri - 43425.
Testileýge qatysýǵa ótinish berýshilerdiń qorytyndysy boıynsha ulttyq testileý ortalyǵymen emtıhan materıaldary daıyndalyp, testileý ótkizý úshin aımaqtarǵa jetkiziledi.
Keshendi testileýge ótken jyldardaǵy jalpy orta bilim berý (orta jalpy) uıymdarynyń bitirýshileri, tehnıkalyq jáne kásiptik (bastaýysh jáne orta kásiptik, orta bilimnen keıingi) bilim berý uıymdarynyń bitirýshileri, UBT-ǵa qatyspaǵan, halyqaralyq oqýshylarmen almasý jelisi boıynsha shetelde oqyǵan jalpy bilim beretin mektep bitirýshileri, oqytý tili qazaq jáne orys tilderinde emes jalpy bilim beretin mektep bitirýshileri, respýblıkalyq mýzyka mektep-ınternattarynyń bitirýshileri, sondaı-aq oqý ornyn shetelde bitirgen tulǵalar qatysady.
Keshendi testileý túsýshilerdiń qalaýy boıynsha qazaq nemese orys tilderinde orta bilim berýdiń oqý baǵdarlamalary kóleminde tórt pán: memlekettik nemese orys tili (oqý tili), Qazaqstan tarıhy, matematıka jáne tańdaý páni boıynsha ótkiziledi.
Testileýdi ótkizý tártibin saqtaýǵa baqylaý júrgizý joǵary oqý oryndary qyzmetkerleri quramynan jasaqtalǵan jáne bilim berý salasyndaǵy ýákiletti organnyń buıryǵymen bekitilgen mınıstrlik ókilderimen júzege asyrylady.
