Keshe respýblıka boıynsha 2 órt oqıǵasy tirkeldi
ASTANA. Jeltoqsannyń 12-si. QazAqparat - Keshe respýblıka boıynsha 2 órt oqıǵasy tirkelgen,
dep habarlaıdy QazAqparat QR TJM-ine silteme jasap.
Mınıstrliktiń derekterine qaraǵanda, keshe Qostanaı oblysynyń Fedorov aýdanyna qarasty Lesnoe aýylyndaǵy jekemenshik turǵyn úıdiń 36 sharshy metr aýmaǵy jalyn qushaǵyna oranǵan. Órtti sóndirý barysynda 38 jastaǵy azamattyń denesi tabylǵan. Tilsiz jaýdy aýyzdyqtaýǵa oblystyq tótenshe jaǵdaılar departamenti órt sóndirý qyzmetiniń 5 adamy men 1 tehnıkasy tartylǵan.
Al Mańǵystaý oblysynyń Túpqaraǵan aýdanyndaǵy «Soltústik Bozaşy» ken ornynyń 96 sharshy metrdi quraıtyn ashanasy órtenip ketken. Qaza tapqandar men zardap shekkender joq. Órtti sóndirýge QR TJM-niń «Órtsóndirýshi» AQ jeke quramynyń 12 mamany men 2 tehnıkasy jumyldyrylǵan.
