Keshe Qazaqstannyń avtojoldarynda 6 adam mert bolyp, 11 adam zardap shekti - TJM
ASTANA. Jeltoqsannyń 29-y. QazAqparat - Ótken dúısenbi, jeltoqsannyń 28-i kúni respýblıka joldarynda bolǵan jol-kólik oqıǵalarynda 6 adam qurban bolyp, taǵy 11 adam túrli dene jaraqattaryn aldy,
dep habarlaıdy QazAqparat.
Tótenshe jaǵdaılar mınıstrligi taratqan málimetterge sáıkes, iri jol-kólik oqıǵasy Ońtústik Qazaqstan oblysy Arys-Shardara avtojolynyń 57-shi shaqyrymynda «VAZ» jáne «Gazel» avtokólikteriniń qatysýymen bolǵan. Onyń saldarynan birinshi kóliktiń eki jolaýshysy sol orynda kóz jumsa, taǵy 4 jolaýshy aýrýhanaǵa jetkizildi.
Sondaı-aq Almaty oblysy Esik-Malovodnoe avtojolynyń 55-shi shaqyrymynda 15 saǵat 45 mınýtta «Folksvagen» jáne «ÝAZ» kólikteriniń soqtyǵysýy oryn aldy. Oqıǵa ornynda «Folksvagenniń» 54 jastaǵy jolaýshysy mert boldy.
Qaraǵandy oblysy Qarqaraly aýdany Kentóbe ken ornynda «KamAZ» júk kóligi «Mazda» avtokóligin qaǵyp ketti. Apatta jeńil kóliktiń 42 jastaǵy júrgizýshisi qurban bolyp, onyń 42 jáne 43 jastaǵy jolaýshylar zardap shekti.
Al Pavlodar qalasynyń Sátbaev jáne Gorkıı kósheleriniń qıylysynda bolǵan «Nıssan» jáne «Mazda» avtokólikteriniń soqtyǵysýynan, 5 adam túrli dene jaraqattarymen aýrýhanaǵa jetkizildi.
