Keshe elimizdiń joǵary jyldamdyqty kúre joldarynda úsh adam mert bolyp, 7 adam zardap shekti
ASTANA. Jeltoqsannyń 4-i. QazAqparat - Beısenbi kúni respýblıka joldarynda oryn alǵan jol-kólik oqıǵalarynda 3 adam qaza taýyp, 7 adam túrli dene jaraqattaryn aldy,
dep habarlaıdy QazAqparat Tótenshe jaǵdaılar mınıstrligine silteme jasap.
Jambyl oblysy Almaty-Tashkent avtojolynyń 154-shi shaqyrymynda «Mersedes» úlgisindegi eki avtokóliktiń soqtyǵysýy saldarynan, Qyrǵyzstan Respýblıkasynyń azamattary bolǵan avtokóliktegi 55-60 jas shamasyndaǵy áıel (tulǵasy anyqtalmaǵan) oqıǵa ornynda jan tásilim etse, sol kóliktiń taǵy úsh azamaty aýrýhanaǵa jetkizildi.
Sondaı-aq, osy avtojoldyń 165-shi shaqyrymynda «BMV» jáne «Hıýndaı» avtokólikteriniń qatysýymen taǵy bir jol-kólik oqıǵasy oryn aldy. Qaıǵyly oqıǵada birinshi kóliktiń júrgizýshisi oqıǵa ornynda mert bolyp, onyń 20 jastaǵy jolaýshysy aýrýhanaǵa jetkizildi.
Shyǵys Qazaqstan oblysy Almaty-Óskemen avtojolynyń 754-shi shaqyrymynda «Aýdı» avtokóligi aýdarylyp, onyń 31 jastaǵy júrgizýshisi alǵan jaraqattardan aýrýhanada kóz jumdy.
Osy kúni Kókshetaý-Rýzaev avtojolynyń 80-shi shaqyrymynda «VAZ» jáne «Folksvagen» avtokólikteri júrgizýshileriniń muqııatsyzdyǵynan oryn alǵan apattyń saldarynan, úsh jolaýshy túrli dene jaraqttarymen aýrýhanaǵa tústi.
