Keshe elimizdiń avtojoldarynda 8 adam qurban bolyp, 6 adam zardap shekti - TJM
ASTANA. Jeltoqsannyń 15-i. QazAqparat - Dúısenbi kúni respýblıkanyń avtojoldarynda oryn alǵan jol-kólik oqıǵalarynda 8 adam qaza taýyp, taǵy 6 adam túrli dene jaraqattaryn aldy,
dep habarlaıdy QazAqparat QR TJM-ǵa silteme jasap.
Іri jol-kólik oqıǵasy Atyraý qalasynda Atyraý-Kúlsary avtojolynyń 20-shy shaqyrymynda «KamAZ» júk kóligi men «Aýdı» avtokóliginiń qatysýymen oryn aldy. Onyń saldarynan jeńil kóliktiń 46 jastaǵy júrgizýshisi men onyń 27 jáne 34 jastaǵy eki jolaýshysy oqıǵa ornynda qaza bolsa, 25 jastaǵy taǵy bir jolaýshysy aýrýhanaǵa jetkizildi.
Sondaı-aq Atyraý oblysynda, Maqat kentinen 90 shaqyrym jerde «Toıota» jáne «Ýral» avtokólikteriniń soqtyǵysýy boldy. Birinshi kóliktiń 49 jastaǵy júrgizýshisi men onyń 33 jasar jolaýshysy oqıǵa ornynda kóz jumdy.
Ońtústik Qazaqstan oblysy Saryaǵash aýdany Sergeli eldi-mekeniniń ishki jolynda «Opel» jáne «Aýdı» avtokólikteri soqtyǵysyp, birinshi kóliktiń 43 jastaǵy jolaýshysy sol orynda kóz jumdy, onyń júrgizýshisi men taǵy 4 jolaýshysy aýrýhanaǵa jetkizildi.
Al Shyǵys Qazaqstan oblysy Almaty-Óskemen avtojolynyń 643-shi shaqyrymynda 20 jasar azamattyń basqarýyndaǵy «Toıota» kóligi aýdarylyp, onyń saldarynan júrgizýshiniń ózi men onyń 21-degi jolaýshysy apat ornynda mert boldy.
