Keshe Almaty-Óskemen avtojolynda eki jol-kólik oqıǵasy boldy
ASTANA. Qarashanyń 10-y. QazAqparat - Dúısenbi kúni Almaty-Óskemen tas jolynda birden eki jol-kólik oqıǵasy oryn aldy. Apat saldarynan eki adam mert bolyp, 4 adam aýrýhanaǵa jetkizildi,
dep habarlaıdy QazAqparat QR TJM-ǵa silteme jasap.
Jol-kólik oqıǵalarynyń biri Alakól aýdanyndaǵy Almaty-Óskemen avtojolynyń 488-shi shaqyrymynda 14 saǵat 20 mınýtta boldy. «Mıtsýbısı» jáne «Folksvagen» avtokólikteriniń soqtyǵysýy saldarynan, «Mıtsýbısı» kóligin mingen áıel azamat (tulǵasy anyqtalǵan joq) oqıǵa ornynda kóz jumsa, onyń 7 jasar jáne ekinshi avtokóliktiń 23 jastaǵy jolaýshysy aýrýhanaǵa jetkizildi.
Ekinshi apat Kóksý aýdanyndaǵy Almaty-Óskemen avtojolynyń 224-shi shaqyrymynda «Toıota» jáne «Sýbarý» avtokólikteriniń qatysýymen 16 saǵat 30 mınýtta oryn aldy. Nátıjesinde 13 jastaǵy qyz oqıǵa ornynda qaıtys boldy, taǵy eki adam aýrýhanaǵa jetkizildi.
