Keshbek: Alaıaqtardan qalaı qorǵanýǵa bolady
NUR-SULTAN. QazAqparat – Qazirgi kezde alaıaqtar adamdardy joǵary keshbekpen qyzyqtyrady. Satyp alý kezinde keshbektiń kómegimen aqsha tabý óte paıdaly, sol sebepti azamattardyń arasynda ózderiniń klıentteri úshin osy optsııany usynatyn bankterdiń jáne basqa da uıymdardyń usynystary joǵary suranysqa ıe. Qarjy alaıaqtary osy tanymal marketıng quralyn paıdalana otyryp, ańqaý tutynýshylar úshin kezekti aılany oılap tapty. QazAqparat Fingramota.kz saıtyna silteme jasaı otyryp osy alaıaqtyq túrinen qalaı qorǵaný týraly keńesterdi usynady
Vıshıng – telefon alaıaqtyǵy
Telefon alaıaqtary klıentke qońyraý shalyp, ózin qyzmet kórsetetin bank qyzmetkeri retinde tanystyrady, olardyń keshbek-servısin paıdalanýǵa usynys jasaıdy. Mysaly, alaıaqtar barlyq bólshek jelilerde satyp alý úshin qoldanylatyn 8 - 30% aralyǵyndaǵy joǵary jáne tıimdi keshbekpen karta shyǵarýǵa usynys beredi. Mundaı kartaǵa qyzmet kórsetý, ádette, tegin, shyǵarý merzimi barynsha az: 1 kúnnen 3 kúnge deıin, kartany jetkizý karantın sharalarynyń kúsheıtilýin eskere otyryp tegin bolýy múmkin. Eger klıent kelisip jaýap berse, onda jalǵan menedjer dybystyq sıgnaldan keıin jumysyn 1-den 10-ǵa deıin baǵalaýdy suraıdy, budan keıin operatorǵa qosady, bul rette sendirý úshin jelide kútýge arnalǵan banktiń áýeni oınaıdy. Jańa operator bárin, kartany qalaı ákelgende yńǵaıly nemese qandaı bólimsheden alýdyń tıimdi ekendigin naqtylaıdy, klıenttiń derekterin qaıta tekseredi jáne, nazar aýdaryńyz, kartany shyǵarýdy rastaý úshin kodty aıtýdy suraıdy, ol klıentke SMS arqyly keledi. Operator klıentke oılanýǵa ýaqyt bermesten, suraqtarǵa tez arada jaýap berýdi suraıdy, bul – onyń qyraǵylyǵyn seıiltý maqsatynda jasalatyn tásil. Qajetti derekter alynǵan soń operator sóılesýin aıaqtap, jumysyn 10 balldyq shkalamen baǵalaýdy suraıdy. Budan keıin eshteńeden habary joq klıent kartasyndaǵy aqshasynyń jetispeıtinine kóz jetkizedi, árıne alaıaqtar úshin aqshany sheship alý túkke turmaıdy.
Aıta keterligi, klıenttiń operatorǵa aıtatyn kody shyn máninde bank klıentiniń jeke kabınetiniń qosymshasyn iske qosýǵa kómektesedi. Alaıaqtar osylaısha aqsha aýdarymdary men ózge tranzaktsııalar júrgize otyryp, banktik shotty basqarý múmkindigine ıe bolady, olar SMS pen push-habarlamalardy óshirip tastaýlary múmkin, mundaı jaǵdaıda klıent óz qarajatynyń joǵalǵany jóninde birden bile almaıdy.
Esińizde bolsyn, naǵyz bank menedjerine siz týraly aqparatty naqtylaý úshin qońyraý shalýdyń qajeti joq: tegi men tólqujat derekteri, tirkelgen kartalar jáne olardyń derektemeleri, sondaı-aq aqsha qarajatynyń qaldyqtary. Bankte sizdiń tolyq qarjylyq derekterińiz jáne kredıt tarıhyńyz bar. Sondyqtan bank qyzmetkerleri bul máselelerge qatysty eshqashan telefonmen habarlaspaıdy. Bul aqparat alaıaqtar úshin ǵana qundy. Sonymen qatar, bank qyzmetkerleri sizden operatsııalar men tólemderdi júzege asyrý úshin qajet banktik kartalaryńyzdyń derekterin suramaıdy. Keıbir avtomattandyrylǵan banktik júıelerden keletin SMS-te: «Kodtardy eshkimge, tipti bank qyzmetkerlerine de bermeńiz» dep kórsetilgen.
Fıshıng – saıttaǵy alaıaqtyq
Fıshıng – alaıaqtar paıdalanýshylardyń qupııa derekterin «shyǵaryp alatyn» ınternet-alaıaqtyqtyń bir túri. Ol úshin alaıaqtar fıshıngtik saıttar, e-mail jiberilimder, qalqymaly terezeler, targettelgen jarnama sııaqty quraldardy paıdalanady. Paıdalanýshylar siltemelerdi qoldana otyryp, zııandy qosymshalardy ashady, al zııankester olardan jeke tólem derekterin alady.
Alaıaqtar birneshe sekýnd ishinde, ásirese eger siz fıshıng saıtyna kirseńiz sizdiń shotyńyzdy bosatýy múmkin. Bul alaıaqtar, mysaly, tólem kartalarynyń derektemelerin alý maqsatynda tanymal ınternet-dúken, bank saıty nemese áleýmettik jeli klonyn quratyn qarjylyq alaıaqtyqtyń bir túri. Olar oǵan siltemelerdi poshta mekenjaılarynyń qolda bar bazasy arqyly taratady, onyń ishinde sizdiń mekenjaıyńyz da bolýy múmkin.
Máselen, alaıaqtar onlaın-dúkenderdiń, bankterdiń jáne ózge de uıymdardyń atynan elektrondyq poshta arqyly jáne SMS-habarlamalar jiberý arqyly, tanymal saıttar men áleýmettik jelilerde oljanyń ornyna joǵary keshbek usyný arqyly qarmaq laqtyryp qoıýy múmkin. Atap aıtqanda, olar paıdalanýshylarǵa Jelide satyp alý úshin keshbek alýdy, ıaǵnı kartadan kartaǵa aýdarý úshin qarajattyń 30%-na deıin jedel qaıtarýdy usynýy múmkin. Eger paıdalanýshy tıisti batyrmany basý arqyly kelisse, onda ol jeke aqparatty engizýge arnalǵan nysany bar fıshıngtik saıtqa túsedi: TAÁ, karta derektemeleri, onyń ishinde kartanyń artqy jaǵyndaǵy úsh tańbaly san. Alaıaqtar osy derekterdi paıdalanyp, ınternet-dúkenderde basqa adamdardyń kartalaryn paıdalaný arqyly satyp alýlar jasaı alady, al paıdalanýshylar joǵary keshbeksiz jáne óz kartalarynda aqshasyz saqalyn sıpap qalady.
Ózińizdi alaıaqtyqtyń osy túrinen qalaı qorǵaýǵa bolady?
Ashkózdikke salynyp ketpeńiz, ekinshiden, qyraǵylyq tanytyp, beıtanys adamdarǵa senýdi toqtatýyńyz kerek. Eger Sizge boljam boıynsha Bank menedjeri qońyraý shalyp, sizge bas tarta almaıtyndaı usynys jasasa, sóılesýdi aıaqtap, bankke resmı nómirler boıynsha qońyraý shalyńyz. Sizdiń tólem kartańyz boıynsha barlyq derekterdi qosa alǵanda, óte jeke aqparatty habarlaýdy suraıtyn, sondaı-aq ártúrli qosymshalardy júkteýdi suraıtyn beıtanys adamdarǵa senbeńiz. Satyp alǵyńyz keletin ınternet-dúkenderdiń URL-mekenjaılaryna nazar aýdaryńyz. Qupııa aqparatty, mysaly, qupııasózderdi engizý qajet saıttarda HTTPS:// prefıksiniń bolýyn tekserińiz.
Aıte keteıik, keshbek – bul taýardy nemese kórsetiletin qyzmetti satyp alýǵa jumsalǵan aqsha qarajatynyń bir bóligin qaıtarý, kóbinese ol balmen nemese kýponmen beriledi.
