«Kerýen» SOO mańyndaǵy jerge qatysty daý: prokýratýra tekseristi bastady

ASTANA. KAZINFORM — Astana prokýratýrasy «Kerýen» saýda, oıyn-saýyq ortalyǵynyń janyndaǵy jer telimine qatysty mámileniń zańdylyǵyn tekserip jatyr. Bul týraly Kazinform agenttiginiń resmı saýalyna joldanǵan jaýapta aıtylǵan. 

Prokýratýranyń málimetinshe, buǵan deıin sot sheshimimen zańdy tulǵalardan Dostyq kóshesindegi № 7 (0,2218 ga) jáne № 7/1 (1,0965 ga) mekenjaıyndaǵy óz maqsatynda paıdalanylmaǵan jer telimderi alynǵan.

2023 jylǵy qyrkúıek jáne qarasha aılarynda № 7 mekenjaıyndaǵy jer telimi jeke tulǵaǵa 68 mln teńgege, al № 7/1 jer telimi 176,9 mln teńgege satylǵan.

Keıin, 2024 jylǵy naýryzda ákimdiktiń qaýlysymen bul jer telimderi memlekettik qajettilik úshin qaıta alynatyn bolǵan. Baǵalaý kompanııasynyń esebine sáıkes, atalǵan ýchaskelerdiń naryqtyq quny 1 mlrd teńgeden asqan.

Alaıda prokýratýra atalǵan soma jergilikti atqarýshy organ men Astana máslıhatynyń kelisimimen bekitilmegenin, sondyqtan memlekettik bıýdjetten bul soma tólenbegenin atap ótti.

Qarjylyq monıtorıng jáne sybaılas jemqorlyqqa qarsy agenttiginiń málimetinshe, bul fakt boıynsha sotqa deıingi tergeý materıaldary tirkelmegen.

— Sonymen qatar, 2025 jylǵy 16 mamyrda Astana qalasy máslıhatynyń depýtaty Smaǵulov A.S.-ten prokýratýraǵa tıisti suraý kelip tústi, ol qazirgi tańda qaralyp jatyr. Osyǵan baılanysty Astana qalasynyń prokýratýrasy jer jáne sáýlet-qurylys zańnamasynyń saqtalýyna qatysty taldaý júrgizip jatyr, — delingen habarlamada.

Eske sala keteıik, buǵan deıin Astana qalasy máslıhatynyń kezekten tys sessııasynda Dostyq dańǵyly boıyndaǵy «Kerýen» SOO janyndaǵy jer telimi máselesi talqylanǵan bolatyn.

Depýtattar 2023 jyly aýktsıonda 175 mln teńgege satylǵan aýmaqtyń qaıtadan 1 mlrd teńgege satyp alynýy múmkin degen aqparatqa alańdaýshylyq bildirgen.