«Kerýen» saýda ortalyǵy janyndaǵy jer elorda menshigine ótti
ASTANA. KAZINFORM – Elorda ákiminiń orynbasary Ersin Ótebaev «Kerýen» saýda ortalyǵy janyndaǵy jer telimin satyp alýǵa qatysty pikir bildirdi.
Onyń atap ótýinshe, atalǵan jer telimi qala menshigine ótken.
– Búginde ol qalaǵa tıesili. Sáýlet basqarmasyndaǵy áriptesterimiz egjeı-tegjeıli aqparat usynady. Ony biz alyp qoıdyq, - dedi qala ákiminiń orynbasary Parlament palatalarynyń birlesken otyrysynan keıin.
Buǵan deıin sot sheshimimen Dostyq kóshesindegi №7 (0,2218 ga) jáne №7/1 (1,0965 ga) jer telimderi maqsatty paıdalanylmaǵany úshin zańdy tulǵalardan alynǵan.
Aýktsıon nátıjesinde 2023 jylǵy qyrkúıek pen qarashada №7 ýchaske jeke tulǵaǵa 68 mln teńgege, al №7/1 ýchaske zańdy tulǵaǵa 176,9 mln teńgege satylǵan.
2024 jylǵy naýryzda ákimdik qaýlysymen bul jerler memlekettik muqtajdyqqa alynatyn aýmaqtarǵa engizilgen. Olardyń naryqtyq quny 1 mlrd teńgeden asqan. Alaıda bul soma bıýdjetten tólenbegen, sebebi qalalyq máslıhat satyp alý jobasyn maquldamaǵan.
Keıin depýtattar 2023 jyly 175 mln teńgege satylǵan jerdi memleket 1 mlrd teńgeden asa somaǵa qaıta satyp alýy múmkin ekenine narazylyq bildirdi. Osyǵan baılanysty depýtattardyń biri aýktsıon zańdylyǵyn tekserý úshin prokýratýraǵa júgingen.
Esterińizge sala ketsek, ótken jyldyń tamyzynda Astana qalasy prokýratýrasy «Kerýen» saýda ortalyǵy mańyndaǵy jer telimderin satý zańdylyǵyn tekserý qorytyndysyna qatysty sotqa talap-aryz berdi.
