«Kerýen» oıyn-saýyq ortalyǵy mańynda bolǵan jol apaty áli tekserilip jatyr
ASTANA. QazAqparat - Ótken jyldyń qarasha aıynda «Kerýen» oıyn-saýyq ortalyǵynyń janynda Infiniti kóligimen bolǵan jol oqıǵasy boıynsha sotqa deıingi tergeý jumystary aıaqtaldy, dep habarlaıdy «QazAqparat» HAA tilshisi.
Eske sala keteıik, 12 qarasha kúni «Kerýen» OSO mańynda Infiniti kóligi jaıaý júrginshilerdi qaǵyp, olardyń biri Álel Rymhanova aýyr jaǵdaıda aýrýhanaǵa jatqyzylǵan bolatyn.
Kólik júrgizýshisi Bolat Moldaǵalıev mańaıdaǵy birneshe kólikti de soqqan edi. Oqıǵa qoǵamda keńinen talqylanyp, ishki ister organdary kólik júrgizýshisine qatysty is qozǵalǵanyn málimdegen.
Osy rette Bolat Moldaǵalıev óziniń Facebook paraqshasynda zardap shegýshilerden keshirim surap, óziniń epılepsııamen aýratyny jaıly post qaldyrǵan.
9 qańtarda Astana qalasynyń prokýratýrasy «QazAqparat» tilshisine telefon arqyly bergen suhbatynda, ol kezde bul iske saraptama jasalyp jatqanyn aıtqan. Jańa jyl aldynda sot-psıhıatrııalyq saraptama ótkizilgen.
«Sarapshylar júrgizýshige qatysty aldaǵy qorytyndylar nátıjesinde sheshim shyǵarady. Onyń qanshalyqty shyn aıtyp júrgeni de belgili bolady. Saraptama qorytyndylary qańtardyń aıaǵynda shyǵady dep oılaımyn»,-dep málimdedi Astana prokýratýrasy.
