«Kerýen» mańyndaǵy kólik apaty: Júrgizýshi qaǵyp ketken qyzdan keshirim surady
ASTANA. QazAqparat - Astanadaǵy «Kerýen» SOSO mańynda bolǵan eldi dúrliktirgen jol-kólik oqıǵasy boıynsha ótip jatqan sotta basty kúdikti Bolat Moldaǵalıevten jaýap alý bastaldy, dep habarlaıdy QazAqparat tilshisi.
Jaýap alý kezinde Moldaǵalıevke alǵash ret jábirlenýshi Ásel Rymhanovadan betpe-bet keshirim suraý múmkindigi berildi. Jábirlenýshi sotqa densaýlyq jaǵdaıyna baılanysty vıdeojazba arqyly qatysty.
«Ásel, men Sizden keshirim suraımyn jáne eger, múmkin bolsa, aıyǵýyńyzǵa kómektesýge daıynmyn. Men ádeıi istegen joqpyn», - dedi ol sotta.
Sondaı-aq, ol jol apaty bolǵan kesh esinde joq ekenin, tek keıbir úzindileri ǵana esinde ekenin jetkizdi.
Eske sala keteıik, 2017 jylǵy 12 qarashada «Kerýen» SOSO mańynda Infiniti avtokóligi eki jaıaý júrginshini qaǵyp, sonyń bireýi - Ásel Rymhanova aýyr halde aýrýhanaǵa jetkizilgen bolatyn, budan tys mashına turaqtaǵy birneshe kólikke de zaqym keltirgen.
