«Kerýen» mańynda bolǵan jol apatyna qatysty negizgi sot talqylaýy bastaldy
ASTANA. QazAqparat - Astanada «Kerýen» saýda oıyn-saýyq ortalyǵy mańynda eki adamdy qaǵyp ketken Bolat Moldaǵalıev isi boıynsha negizgi sot talqylaýy bastaldy, dep habarlaıdy «QazAqparat» HAA tilshisi.
2017 jylǵy 12 qarashada «Kerýen» SOSO mańynda Infiniti avtokóligi eki jaıaý júrginshini qaǵyp, sonyń bireýi - Ásel Rymhanova aýyr halde aýrýhanaǵa jetkizilgen bolatyn, budan tys mashına turaqtaǵy birneshe kólikke de zaqym keltirgen.
Oqys oqıǵa eldiń qyzý talqysyna tústi. Kúdikti Bolat Moldaǵalıev Facebook-te jarııaly túrde zardap shekkenderden keshirim surap, epılepsııamen aýyratynyn jetkizgen.
QR Іshki ister mınıstrliginiń ókilderi sotqa deıingi tergep-tekserýler júrip jatqanyna baılanysty, is týraly pikir bildirýden bas tartyp keldi. Sondaı-aq, Astana densaýlyq saqtaý basqarmasyndaǵylar da kúdiktiniń epılepsııadan zardap shegetini týraly faktini ne rastamady, ne joqqa shyǵarmady.
Tergeý barysynda tek prokýratýradaǵylar qysqasha pikir bildirdi. Astana prokýratýrasynan alynǵan málimetterge qaraǵanda, Moldaǵalıevtiń (kúdikti) sońǵy bes jylda 4 jol-kólik oqıǵasy úshin jazalanbaǵany, medıtsınalyq tekserýden ótpegendigi týraly málimetter shyndyqqa janaspaıdy. Zardap shekken qyzdyń ákesi Nurlan Rymhanov buǵan deıin Facebook-tegi paraqshasynda oqıǵanyń vıdeosyn qosymsha ete otyryp, tergeýdiń barysy jaıynda pikirin aıtqan bolatyn.
