Keruen Inn jelisi Qazaqstandaǵy jetinshi qonaqúıin ashty
ASTANA. KAZINFORM — Qaraǵandyda Keruen Inn jelisiniń jańa qonaqúı kesheni ashyldy. Ol jol boıyndaǵy servıstik keshen retinde jumys isteıdi. Munda qonaqúı, tamaqtaný oryndary, avtoturaq, elektr kólikterine arnalǵan qýattaý stantsııalary men tsıfrlyq servıster bir jerde shoǵyrlanǵan.
Búginde alys jolǵa shyqqan jolaýshylar úshin tek janarmaı quıý jetkiliksiz. Olar jolda tynyǵyp, tamaqtanyp, saparyn jaıly jalǵastyrýǵa múmkindik beretin qyzmetterdiń bir jerde bolǵanyn qalaıdy. Qazaq Oil kompanııasynyń málimetinshe, osyǵan baılanysty jol boıyndaǵy servıstiń formaty da ózgerip keledi.
Barlyq qajetti qyzmet bir jerde usynylatyn mundaı keshender demalysqa, issaparǵa nemese jaqyndaryna jol tartqan jolaýshylar úshin qolaıly.
Osy baǵyttaǵy jobalardyń biri — Keruen Inn jol boıyndaǵy qonaqúıler jelisi. Qaraǵandydaǵy jańa nysannyń ashylýymen jelidegi qonaqúıler sany jetige jetip otyr. Buǵan deıin Merke, Aral, Semeı, Aqtaý, Atyraý jáne Qarqaraly qalalarynda ashylǵan.
Joba tujyrymdamasyna sáıkes, saıahatshylarǵa qajetti qyzmetterdiń bári bir jerde usynylady. Máselen, keshenderde Q-Café men Dala Market jumys isteıdi, sondaı-aq kúzeti bar avtoturaqtar jáne Qazaq Energy Charge elektr kólikterin qýattaý stantsııalary qarastyrylǵan.
Barlyq servıs Vlife tsıfrlyq platformasyna biriktirilgen. Onyń kómegimen qonaqtar qyzmet aqysyn tólep, bonýstar jınap, olardy seriktes uıymdarda paıdalana alady.
Qaraǵandydaǵy jańa Keruen Inn kesheniniń aýmaǵy myń sharshy metrden asady. Munda 31 qonaqúı nómiri bar. Sondaı-aq kezdesýler men túrli is-sharalardy ótkizýge arnalǵan zamanaýı konferents-zal jabdyqtalǵan.
— Búginde Keruen Inn jelisi jeti qonaqúıdi biriktirip otyr. Bul — jobany damytýdaǵy mańyzdy kezeń. Biz Qazaqstannyń qaı baǵytyna jol júrse de, saıahatshylarǵa jaıly jaǵdaı jasaý úshin zamanaýı jol boıyndaǵy keshender jelisin damytyp kelemiz, — dedi Qazaq Oil kompanııasynyń damý jónindegi dırektory Oralhan Omarov.
Kompanııanyń málimetinshe, Keruen Inn jelisin damytý — Qazaq Oil-dyń jol boıyndaǵy zamanaýı ekojúıeni qalyptastyrýǵa baǵyttalǵan uzaq merzimdi strategııasynyń bir bóligi. Osy maqsatta janarmaı quıý qyzmeti, qonaqúı ınfraqurylymy, qoǵamdyq tamaqtaný oryndary, tsıfrlyq servıster men saıahat kezinde qajet bolatyn basqa da qyzmetter bir júıege biriktirilip jatyr.
