Kerqulandar «Altyn Dala» rezervatynda tabıǵatqa jiberildi
ASTANA. KAZINFORM - 25 mamyrda «Altyn Dala» memlekettik tabıǵı rezervatynyń aýmaǵynda kerqulandardyń (kertaǵynyń) bir toby tabıǵatqa jiberildi, dep habarlaıdy QR Ekologııa jáne tabıǵı resýrstar mınıstrliginiń baspasóz qyzmeti.
Baspasóz qyzmetiniń málimetterine qaraǵanda, aıǵyr Galvan Qazaqstanǵa Praga qalasynan, al tórt bıe Vengrııadaǵy Hortobad ulttyq parkinen jetkizilgen bolatyn. Bir jyl boıy janýarlar mamandar men veterınarlardyń turaqty baqylaýymen reıntrodýktsııa ortalyǵynyń keń qashalarynda beıimdelý kezeńinen ótti.
Osy ýaqyt ishinde kerqulandar jańa tabıǵı-klımattyq jaǵdaılarǵa sátti beıimdelip, qysty aman ótkizip, daladaǵy derbes tirshilikke daıyndaldy.
Tabıǵatqa jiberer aldynda Galvan aıǵyryna GPS-qarǵybaýy taǵyldy. Ol úıirdiń qozǵalysyn baqylaýǵa jáne janýarlardyń tabıǵı ortadaǵy minez-qulqy týraly mańyzdy aqparat alýǵa múmkindik beredi.
Tabıǵatqa jiberilgennen keıin Galvan bastaǵan tórt bıeden turatyn úıir «Altyn Dala» memlekettik tabıǵı rezervatynyń aýmaǵyn ıgere bastady. Mamandardyń baqylaýy boıynsha janýarlardyń jaǵdaıy jaqsy, olar jańa jaıylymdar men sýattardy belsendi túrde zerttep jatyr.
Kerqulandar tabıǵatqa jiberilgennen keıin de rezervattyń memlekettik ınspektorlarynyń turaqty baqylaýy men qorǵaýynda bolady. Mamandar olardyń qozǵalysyn jáne jabaıy tabıǵatqa beıimdelýin odan ári qadaǵalaıdy.
Kerqulandardy tabıǵatqa jiberý osy sırek túrdi tarıhı mekendeý ortasyna qaıtarý baǵdarlamasyn iske asyrýdaǵy mańyzdy kezeń jáne Qazaqstandaǵy tabıǵı popýlıatsııasyn qalpyna keltirý jolyndaǵy kezekti qadam boldy.
-Qazaqstandaǵy sırek kezdesetin jáne joıylyp ketý qaýpi tóngen jabaıy janýarlar túrlerin saqtaý men qalpyna keltirý jobasyn iske asyrýǵa qatysyp jatqan barlyq seriktesterimizge alǵysymyzdy bildiremiz,-delingen habarlamada.
Osyǵan deıin Qazaqstanǵa Chehııadan kerqulan ákelý 2029 jylǵa deıin jalǵasatyny týraly jazdyq.
