Kereı men Jánibekke ergen 200 myń qazaqtyń sany jer júzinde 15 mıllıonnan asty - Elbasy
Búgin Táýelsizdik saraıynda Qazaq handyǵynyń 550 jyldyq mereıtoıyna arnalǵan saltanatty jıyn barysynda Elbasy Nursultan Nazarbaev osylaı deı kele, taǵy myńdaǵan qazaq asharshylyq pen soǵysta qyrylmasa, qansha bolar edik degen oıyn jetkizdi.
«Básekege qabiletti elý eldiń qatarynan berik oryn alyp, álemdegi úzdik otyzdyqtyń qatarynan kirýdi basty strategııalyq maqsat etip otyrmyz. Alda Astanada ǵylym men tehnıkadaǵy, ónerkásiptegi jańalyq ataýlyny nasıhattaıtyn EXPO-2017 kórmesin ótkizý mindeti bar. Qazir adamzat qoǵamy jańa ındýstrııalyq revolıýtsııanyń qarsańynda tur. Oǵan Qazaqstannyń ekonomıkasy men ónerkásibi daıyn bolý úshin biz údemeli ındýstııalyq-ınnovatsııalyq damý baǵdarlamasyn jasap, onyń ekinshi bes jyldyǵyn oryndaýdamyz.Buny álemdik básekege qabiletti bolý úshin jasap otyrmyz», - deıdi Memleket basshysy.
QR Prezıdenti atap ótkendeı, Qazaqstan bıyl Dúnıejúzilik saýda uıymynyń resmı múshesi atandy, elimizde bes ınstıtýtsıonaldy reformany júzege asyrý jumysy bastaldy. «Tıisti memlekettik organdar ony (5 reformany - agenttik) ret-retimen júzege asyrýǵa kirisip ketti. Bul reforma bizdi jańa bıikterge bastaıdy», - dedi N.Nazarbaev.
Al Qazaq handyǵynyń 550 jyldyǵy taqyrybyna oralǵan Elbasy: «Egemen bolmaı, el bolmas» degendeı, biz azattyq jyldarynda shyn máninde uly joldan óttik. Táýelsizdik kezeńi biz úshin ǵasyrlar júgin arqalaǵan ǵalamat kezeń boldy. Kezinde Kereı men Jánibekke ergen halyqtyń uzyn sany 200 myń shamasynda bolǵan eken. Búginde sol qazaqtyń qatary jer júzinde 15 mıllıonnan asyp jyǵyldy. Al eger qazaq ótken ǵasyrdyń asharshylyǵyna ushyramasa, qan soǵysta qyrylmasa, qazaqtyń sany qansha bolar edi, ózderińiz oılap kórińizdershi...» - dedi.
