Kereı men Jánibek tikken kıeli tý jyǵylǵan joq, Qazaqstannyń Táýelsizdigimen birge kóterile tústi - N. Nazarbaev
aýsymnyń 1-i. QazAqparat /Qanat Mámetqazyuly/ - Kereı men Jánibek tikken kıeli tý jyǵylǵan joq. Ol Qazaqstannyń Táýelsizdik alýymen birge, aspan astynda qalyqtaǵan qyrandaı shyrqaý bıikke kóterile tústi. Búgin QR Prezıdenti Nursultan Nazarbaev Kereı men Jánibek handardyń monýmentaldy músindik-kórkem kompozıtsııasyn ashý rásiminde sóılegen sózinde osylaı dedi.
«Eskertkishte erkindik alyp, jańa ordanyń irgesin tikken handarymyzdyń ulystyń baıraǵyn myǵym ustap turǵanyn kórip tursyzdar. Bul Súıinbaı aqyn aıtqandaı «bórili baıraq kótergen» dańqty babalardyń máńgilik el ornatýdy ańsaǵanynyń mánisi. Rasynda, Kereı men Jánibek tikken sol kıeli tý jyǵylǵan joq. Ol Qazaqstannyń Táýelsizdik alýymen birge, aspan astynda qalyqtaǵan qyrandaı shyrqaý bıikke kóterile tústi. Sondyqtan da biz Táýelsizdiktiń kók baıraǵyn berik ustap, egemendigimizdi kózimizdiń qarashyǵyndaı qorǵaýǵa tıispiz. «Erkindik qaıda bolsa - eldik sonda», deıdi halyq danalyǵy. Qazaqtyń «Egemen bolmaı el bolmas» degen de sózi bar. Túptep kelgende Kereı men Jánibek tusynda tarıh sahnasyna shyqqan «qazaq» degen sóz egemen, enshisin alǵan erkin el degen maǵynany beredi. Al babalarymyzdyń ulystyń atyna tańǵan, azattyq ańsaryn aqıqatqa aınaldyrý - bizdiń urpaqtyń mańdaıyna jazylypty», dedi N. Nazarbaev.
Sonymen birge, Prezıdent búgingi kúni egemen Qazaqstannyń aıdaı álemge tanylǵan aıbyndy memleketke aınalǵanyna da toqtalyp ótti. Memleket basshysy bul rette berekeli birligi merkeli tirligimen ushtasqan Qazaqstan damýdyń daǵyl jolyna túskendigin, elimizdiń batystyń bedeldi uıymyna jetekshilik etkenin, halqymyz buryn-sońdy bolmaǵan tabysqa qol jetkizgenin atap ótti.
