Kerekýde qarbyz egetin jer azaıǵan

PAVLODAR. KAZINFORM - Byltyr Ertis-Baıan óńiriniń fermerleri jalpy aýmaǵy 1938 gektarǵa baqsha ónimderin ekken. Al bıyl bul kórsetkish birden 38 paıyzǵa azaıyp otyr.

Dámi til úıiretin Kerekýdiń qarbyzy dese, eleń etpeıtin jan joq. Buryn egiste teńkıgen teńbil qarbyzdar ǵana dopsha úrlenip jatatyn bolsa, sońǵy ýaqytta sharýalar túrli tústi sorttardy keńinen ósire bastaǵan. Jasyl, sary, qara, tipti qyzǵylt-sary tústi daqyldar – dalanyń sáni. Jergilikti baǵbandar búginde dala tósin dúbirge toltyryp, baqsha ónimderin jınaý naýqany bastalyp ketti.

Pavlodar oblysy Aýyl sharýashylyǵy basqarmasynyń málimetinshe, óńirde qarbyz ósiriletin egis tanaptary jyl sanap azaıyp keledi. Byltyr jergilikti sharýalar jalpy salmaǵy 76,6 myń tonna qarbyz jınasa, bıyl bul kórsetkish shamamen 48,2 myń tonnaǵa jetedi degen boljam bar.

Basqarmanyń statıstıkalyq derekterine súıensek, óńirde 2022 jyly 2092 gektarǵa, 2023 jyly 1938 gektarǵa qarbyz egilse, bıyl qarbyz túınekterine arnalǵan egis aýmaǵy birden 38 paıyzǵa kemigen. Tipti Aqqýly aýdanyndaǵy «Qaırat» sharýa qojalyǵynyń ózi sońǵy jyldary mal sharýashylyǵyna, kópjyldyq shópter egýge den qoıa bastaǵan.

Mamandar jergilikti qarbyzdy jappaı jınaý qyrkúıek aıynda bastalatynyn aıtady. Ázirshe erte piskenderi jergilikti naryqta kelisi 220-250 teńgeden saýdalanyp jatyr. Al ońtústikten jetkizilip jatqan qarbyzdyń baǵasy 150 teńge turady. Baqsha ónimderi Aqqýly, Pavlodar aýdandarynda, Ekibastuz ben Aqsý qalalarynyń aýyldyq aımaǵynda ósiriledi.

Buǵan deıin Qazaqstan óńirlerinde qaýyn men qarbyz qansha turatyny jaıynda jazǵan edik.