Kerbulaq aýdany Nurym aýylyndaǵy alma baqqa Nurǵalı Núsipjanovtyń esimi berildi - Almaty oblysy
ALMATY. 8 qyrkúıek. QazAqparat - Halyqqa eńbek sińirip júrgen qaıratkerlerimiz ben batyrlarymyzdy kózi tirisinde qurmetteýimiz kerek.
Bul týraly keshe Almaty oblysy Kerbulaq aýdanynyń Basshı aýylynda «Týǵan tabıǵatty aıalaıyq» dep atalatyn respýblıkalyq ǵylymı-tanymdyq konferentsııanyń ashylý rásiminde aıtyldy.
«Bul konferentsııa bıyl besinshi ret uıymdastyrylyp otyr. Bizdiń maqsatymyz - el aýmaǵynyń 4 paıyzyn ǵana quraıtyn orman-toǵaılardyń kólemin ulǵaıtýǵa atsalysý. Endi Nurym aýylyndaǵy alma baq Qazaqstan Respýblıkasynyń halyq ártisi, Qazaqstan Lenın komsomoly jáne Memlekettik syılyqtarynyń ıegeri, ánshi Nurǵalı Núsipjanovtyń atymen atalady. Bul basylym ujymy men jerlesteriniń áıgili óner qaıratkerine degen tartýy», - deıdi «Gúlstan» respýblıkalyq ǵylymı-tanymdyq jáne kópshilik jýrnalynyń bas redaktory» jáne «Gúlzar» qoǵamdyq birlestiginiń jetekshisi Gózel Quljabaeva. Onyń aıtýynsha, ashylǵanyna 1 jyl 3 aı bolǵan bul baqqa kúzdik jáne qystyq almalar egilgen. Baq tek jemis berip qoımaı, aýyldy shań-tozań men borannan qorǵaıdy. Budan bólek aýyl men baqtyń arasyna 6 qatarlyq terekter egilgen. Jylyna 7 metrge deıin ósetin bul terekterdiń ara qashyqtyǵy 1 metr bolady. Onda sondaı-aq, bolashaqta tabıǵı qorshaý bolatyn taldar otyrǵyzylyp otyr.
