Keramıkalyq mozaıkadan alǵash ret Abaıdyń alyp portreti qurastyryldy
Abaıdyń alyp portreti Petropavldaǵy Abaı kóshesi men Áýezov kósheleriniń qıylysynda, kópqabatty úıdiń qabyrǵasynda paıda boldy. Shamamen 150 sharshy metrdi alǵan bul panno keramıkalyq mozaıkadan qurastyrylǵan.
«Jumys qańtar aıynda bastaldy. Aldymen, jobasyn jasap, ony oblystyq ákimdikte bekittik. Qala ákimi Bolat Jumabekovtiń qoldaýymen sáýir aıynda iske kirisip kettik. Orasan jumys isteldi. Keramıkalyq qysh taqtashalardyń árqaısysyna sýret salyp, ony óńdep, shatastyrmaý úshin nómirledik. Keramıkalyq plıtkanyń árqaısysyn 830 gradýs temperatýrada qyzdyrý kerek. Odan 10-15 gradýsqa asyryp jiberseń nemese jetkizbeseń – sapasy búlinedi. Kóp ýaqyt osy qysh taqtashalardy ázirleýge jumsaldy», - deıdi jobanyń avtory, QR Sýretshiler odaǵynyń múshesi Bolat Áserbekov.
Qajetti materıal negizinen Almatyda ázirlendi.
«Bul jumysty qolǵa alǵanda táýekelge bel býdyq. Óıtkeni buǵan deıin Qazaqstanda eshkim keramıkalyq panno jasaǵan emes, sonyń ishinde adamnyń portretin. Jalpy, bul ádisti negizinen meshitterde qoldanady. Meniń jumystarymnyń biri – ol Petropavldaǵy 19-ynshy shaǵynaýdandaǵy meshittiń ishki bezendirilýi. Bul biregeı jobada 4 adam jumys istedi. Olar almatylyq qurylysshylar, óz isiniń kásibı sheberleri. 20 jyl birge qoıan-qoltyq eńbek etip kelemiz», - deıdi sýretshi.
Bolat Áserbekov – Qazaqstanǵa tanymal sýretshilerdiń biri. Petropavldyń týmasy, qazir Almatyda turady. Negizgi mamandyǵy kórkem keramıkamen baılanysty.
«Aısha bıbi mazarynda, Qoja Ahmet ıAsaýı mavzoleıinde, taǵy da basqa kóptegen tarıhı eskertkishterde qysh taqtashalar qoldanylǵan. Olar áli kúnge deıin óńin bermeı tur. Biz buǵan deıin mundaı úlken kólemde qysh taqtashalarmen jumys istegen joqpyz. Birinshi jumysymyz, kóńilden shyqty. Tájirıbe aldyq», - deıdi QR Sýretshiler odaǵynyń múshesi Bolat Aserbekov.
