Keptirilgen marıhýana tasymaldaǵan qyzylordalyq qamaýǵa alyndy
TÚRKІSTAN. KAZINFORM- Túrkistandyq polıtseıler jolaýshydan 2 keli esirtki tárkiledi.
Oqıǵa «Batys Eýropa - Batys Qytaı» trassasy boıyndaǵy «Saýran» beketiniń janynda boldy. Toyota camry markaly kólikti toqtatyp, tekserý júrgizgen tártip saqshylary jolaýshydan esirtkige uqsas zaty bar 3 polıetılen paketin tapty.
Alynǵan zattyń jalpy salmaǵy shamamen 2 keli «keptirilgen marıhýana» bolyp shyqty.
- Jedel-izdestirý is-sharalarynyń nátıjesinde Túrkistan oblysynyń polıtsııa qyzmetkerleri 42 jastaǵy kúdiktini esirtkini zańsyz saqtaǵany men tasymaldaǵany úshin ustady. Qazirgi ýaqytta atalǵan fakti boıynsha qylmystyq is qozǵaldy. Kúdikti, Qyzylorda oblysynyń turǵyny qamaýǵa alyndy. Oqıǵanyń barlyq mán-jaıyn anyqtaýǵa baǵyttalǵan jedel-tergeý is-sharalary júrgizilýde, - delingen Túrkistan oblysy polıtsııa departamentiniń baspasóz qyzmeti taratqan aqparatta.
Aıta keteıik, Almatyda esirtkini jasyryn qoıyp ketýmen aınalysqan 105 adam ustaldy.