Keptelis salyǵy 4 aıda Nıý-Iork qalasyna 216 mıllıon dollar ákeldi
ASTANA. KAZINFORM – AQSh-tyń Nıý-Iork qalasynyń ortalyq kóshelerinde kólik qozǵalysy úshin 2025 jyldyń basynda engizilgen tólem qazynaǵa 216 mıllıon dollar ákeldi, dep habarlaıdy Bloomberg Nıý-Iork qalalyq kólik basqarmasyna (MTA) silteme jasap.
Júrgizýshiler Manhettendegi 60-shy kósheniń ońtústiginde júrý úshin saǵatyna 9 dollar tóleıdi.
Operatordyń esepteýi boıynsha, jańa tarıf jyl sońyna deıin 500 mıllıon dollarǵa deıin tabys ákelýi múmkin. Jınalǵan qarjy megapolıstiń qoǵamdyq kólikterin, sonyń ishinde áıgili Nıý-Iork metrosyn jańǵyrtýǵa baǵyttalady.
Tarıftik baǵdarlamanyń maqsattaryna keptelispen kúresý jáne Nıý-Iork qalasynyń ortalyǵyndaǵy aýa sapasyn jaqsartý kiredi. Bloomberg mundaı tólemder AQSh-tyń iri qalalarynda eshqashan jasalmaǵanyn atap ótti.
Jańashyldyq shynymen de qalanyń keıbir kóshelerindegi kólik qozǵalysyn jeńildetkeni basa aıtyldy. 5 qańtar men sáýir aralyǵynda Manhetten aımaǵyna ótken jyldyń sáıkes kezeńimen salystyrǵanda 8 mıllıonǵa az kólik kirdi. Alaıda AQSh-tyń kólik mınıstri Shon Daffı basqarmanyń sheshimin unatpady. Onyń aıtýynsha, jańa tarıf shaǵyn bıznes pen amerıkalyq kedeı jumysshylardyń qaltasyna salmaq túsirip otyr. Eger keptelis tarıfi joıylmasa, Daffı Nıý-Iorktegi kólik jobalaryn qarjylandyrýdy toqtatamyn dep qorqytty jáne jeńildetý úshin sotqa júgindi.
AQSh okrýg sýdıasy Lıýıs Laıman federaldy úkimetke 9 maýsymdaǵy kelesi sot otyrysyna deıin ýaqytsha birdeńe jasaýǵa tyıym saldy.
Eske sala keteıik, Nıý-Iork ortalyǵyna kirý budan bylaı aqyly bolatyny jaıly jazǵan edik.