Kepilsiz tutynýshylyq nesıeleýdiń baıaýlaǵany baıqalady - UB

ASTANA. KAZINFORM — 2025 jyldyń qorytyndysy boıynsha bólshek saýda aınalymy naqty mánde 7,5 paıyzǵa artty. Bul týraly Ulttyq bank tóraǵasy Tımýr Súleımenov aıtty.

- Qazaqstan ekonomıkasy qarqyndy ósip keledi. Jalpy ishki ónimniń ósimi 6,5 paıyz boldy. Ekonomıkalyq ósimniń negizgi qozǵaýshy kúshteriniń róli saqtalyp otyr. Jalpy ishki ónimniń dınamıkasyna kólik, qurylys, taý-ken ónerkásibi jáne saýda kóp úles qosyp otyr. Óńdeý ónerkásibinde oń dınamıka baıqalady. Іshki suranys turaqty bolyp qaldy. Oǵan bólshek saýda dınamıkasy men qyzmetterge suranystyń ósýi áser etti. 2025 jyldyń qorytyndysy boıynsha bólshek saýda aınalymy naqty mánde 7,5 paıyzǵa artty. Sonymen qatar, jeltoqsan aıynda azyq-túlikke jatpaıtyn taýarlardy satý qarqyny jedeldegenin sezdik. Bul sol kezde kútilgen salyq júıesindegi ózgeristermen baılanysty dep túsinemiz, - dedi ol.

UB tóraǵasynyń aıtýynsha, tabys jáne kredıtteý dınamıkasy ýaqytsha yqpal etip, ınflıatsııa qarqyny tabys kólemine qysym jasap otyr. Sonymen qatar, kepilsiz tutynýshylyq nesıeleýdiń baıaýlaǵany baıqalady.

- Bul, sózsiz, oń qubylys. 2025 jylǵy 11 aıdyń qorytyndysy boıynsha kredıtteý kóleminiń ósimi aıtarlyqtaı azaıyp, jyl basyndaǵy kórsetkishtermen salystyrǵanda, 7,3 paıyzdy qurady. Investıtsııalyq belsendilik joǵary deńgeıde qaldy. Negizgi kapıtalǵa salynǵan ınvestıtsııalar naqty mánde 13 paıyzǵa ósse, shıkizatqa jatpaıtyn sektordaǵy jeke ınvestıtsııalar 19,1 paıyzǵa deıin artty, - dedi Tımýr Súleımenov.

Aıta keteıik, búgin Ulttyq bankiniń Aqsha-kredıt saıasaty komıteti bazalyq mólsherlemeni +/- 1 p. t. dálizimen jyldyq 18% deńgeıinde belgileý týraly sheshim qabyldady.