«Kepilsiz nesıe rásimdeımin»: Oralda ınternet-alaıaqtyqqa qatysy bar kúdikti ustaldy
ASTANA. KAZINFORM – Batys Qazaqstan oblysy PD kıberqylmysqa qarsy is-qımyl basqarmasy men Oral qalalyq PB krımınaldyq polıtsııa qyzmetkerleri birneshe alaıaqtyqqa qatysy bar degen kúdikpen 32 jastaǵy qala turǵynyn ustady.
Polisia.kz portalynyń málimetinshe, tergeý barysynda kúdikti Instagram áleýmettik jelisinde kepilsiz nesıe rásimdeý týraly jalǵan jarnama jarııalap, azamattardy WhatsApp messendjerindegi silteme arqyly ótip, mıkrokredıttik uıymdardan onlaın nesıe alýǵa kóndirip otyrǵan. Nesıe rásimdeý kezinde ol qarajatty ózine jáne tanystarynyń bank shottaryna aýdarýdy suraǵan. Jábirlenýshilerge verıfıkatsııadan ótý úshin arnaıy siltemeler jibergen.
Nesıe maquldanǵannan keıin aqsha kórsetilgen esepshottarǵa, keıin kúdiktiniń atyna tirkelgen shotqa aýdarylyp, qaladaǵy túrli bankomattar arqyly qolma-qol aqshaǵa aınaldyrylǵan. Kúdiktiniń úıin tintý barysynda 27 telefon, 4 SIM-karta jáne 4 bank kartasy tárkilendi.
Qazirgi tańda tórt epızod boıynsha qylmystyq is qozǵaldy. Keltirilgen jalpy shyǵyn kólemi — 1,5 mln teńgeden astam. Kúdikti ýaqytsha ustaý ızolıatoryna qamaldy.
Tergeý júrgizilip jatyr.
Eske salsaq, buǵan deıin Almaty men Almaty oblysynda uıymdasa esirtki taratqandar ustalǵanyn jazǵan edik.