Kepilge qoıylǵan úı «satylyp ketken»: Qyzylorda soty mámileni jaramsyz dep tanydy
QYZYLORDA. KAZINFORM – 2022 jyly Qyzylorda qalasynyń 70 jastaǵy turǵynynyń úıi 19 mln teńgege jasalǵan satyp alý-satý sharty negizinde basqa adamnyń atyna rásimdelgen.
Qyzylorda oblystyq sotynyń málimetinshe, áıel úıin satýdy múldem josparlamaǵan.
- Onyń aıtýynsha, uly qaryzǵa aqsha alǵan, al úı sol qaryzdy óteý úshin kepilge qoıylǵan. Jasynyń ulǵaıýyna, estý jáne kórý qabiletiniń nasharlaýyna baılanysty notarıýsta turǵyn úıdi satý týraly emes, ony kepilge qoıý týraly qujattarǵa qol qoıyp jatyrmyn dep oılaǵan. Ol úsh jarym jyl boıy óz úıinde turyp, kommýnaldyq qyzmetterdiń aqysyn tólep kelgen jáne turǵyn úıdiń zań júzinde basqa adamnyń atyna rásimdelgenin bilmegen. Úıdi satyp alýshy ony jáne onyń otbasy múshelerin turǵyn úıden shyǵarý týraly talap aryzben sotqa júgingen. Óz kezeginde úı ıesi satyp alý-satý shartyn jaramsyz dep taný týraly qarsy talap qoıǵan, - delingen habarlamada.
Sot satyp alý-satý shartynyń is júzinde qaryzdy qamtamasyz etý quraly retinde paıdalanylǵanyn anyqtady. Sonymen qatar turǵyn úıdi ádettegi satý jaǵdaıyna sáıkes kelmeıtin birqatar mán-jaıǵa nazar aýdardy.
- Atap aıtqanda, satyp alýshy úsh jarym jyldan astam ýaqyt boıy úıge talap qoımaǵan, ony paıdalanbaǵan jáne tipti úıge kelmegen. Osy ýaqyttyń barlyǵynda áıel otbasy múshelerimen birge daýly úıde turyp, ony kútip-ustaý shyǵynyn ózi kótergen. Sot sondaı-aq 19 mln teńgeniń áıeldiń ulyna satyp alýshynyń ákesi tarapynan qaryz retinde berilgenin anyqtady. Dál osy qaryzdy qamtamasyz etý maqsatynda daýly mámile rásimdelgen. Sonymen qatar 2023-2024 jyldary «satyp alýshyǵa» 4 mln teńge qaıtarylǵan. Іs materıaldaryn zerdeleı kele, sot qarsy talap aryz ıesi óz úıin is júzinde basqaǵa berýge nıeti bolmaǵan degen qorytyndyǵa keldi. Al satyp alý-satý sharty turǵyn úıdi naqty satý maqsatynda emes, bereshekti qaıtarýdy qamtamasyz etý úshin jasalǵan, - delingen sot habarlamasynda.
Nátıjesinde Qyzylorda qalasynyń soty satyp alý-satý shartyn jaramsyz dep tanyp, qart áıeldiń turǵyn úı quqyǵyn qalpyna keltirdi. Mámileni rásimdeý kezinde anyqtalǵan buzýshylyqtarǵa baılanysty sot oblystyq ádilet departamenti basshysynyń atyna jeke uıǵarym shyǵardy. Vedomstvoǵa jekeshe notarıýstyń áreketterine quqyqtyq baǵa berip, anyqtalǵan kemshilikterdi joıý tapsyryldy.
Apellıatsııalyq jáne kassatsııalyq satylardaǵy sottar birinshi satydaǵy sottyń sheshimin ózgerissiz qaldyrdy.
BuǵandeıinbizQyzylorda oblysy Qazaly aýdandyq sotynyń tóraǵasy D. Ábdiqalyqov pen sýdıa S. Bertaıǵa qatysty sot úkimi shyǵarylyp, olarǵa 9 jyl merzimge bas bostandyǵynan aıyrý jazasy taǵaıyndalǵanyn jazdyq.
