Kepilge qoıylǵan páterlerdi jalǵa alýǵa bolady - Ulttyq bank
Qarjy retteýshisi salymshylardyń múmkindigin eskerip, osyndaı qadamǵa baryp otyr. Sarapshylar 2017 jyly eldegi ekonomıkalyq ahýaldy saralaı kele ıpotekalyq nesıe alǵandardy eki topqa bólip qaraǵan.
Birinshisi shetel valıýtasymen nesıe alǵandar, ekinshisi ıpotekany qaıta qarjylandyrý baǵdarlamasyna qatysqanymen tólem qabileti tómen boryshkerler. Ulttyq bank naýryz aıynda bul baǵdarlamaǵa ózgeris engizip, 2016 jyly shetel valıýtasymen ıpoteka rásimdegenderdiń nesıesin 2015 jylǵy teńge baǵamyna aýystyrý jóninde sheshim qabyldaǵan bolatyn.
Bul baǵdarlama 2026 jylǵa deıin uzartyldy. Biraq baǵdarlama boıynsha qaıta qarjylandyrýǵa ótinish osy jyldyń 15 jeltoqsanyna deıin ǵana qabyldanady. Endi Ulttyq bank tabysy tómen turǵyndar úshin taǵy bir tıimdi jaǵdaı qarastyryp otyr.
«Ulttyq bank ekinshi deńgeıli bankterge kepilge qoıylǵan páterlerdi baspanaǵa muqtaj adamdarǵa jalǵa berýge ruqsat etti. Bul ózgeris 1 shilde kúni kúshine engen. Qazir onyń mehanızmi oılastyrylyp jatyr. Eger salymshy kepilge qoıylǵan páterdiń aı saıynǵy aqysyn tólep bitse, onda páter sol adamnyń menshigine ótedi. Bul baǵdarlamaǵa tek baspanasyn bankke kepilge qoıǵan turǵyndar ǵana qatysa alady», - dedi QR UB turǵyndardyń qarjylyq saýatyn arttyrý bóliminiń basshysy Mınısa Hýsnýtdınova.
