Kepildik berý júıesi: Fermerlerge kredıt alý jeńildeıdi
ASTANA. QazAqparat - «QazAgroKepil» AQ nesıe alý úshin kepildik múlki jetispegen fermerlerge kómek kórsetpek. Bul týraly OKQ-da ótken baspasóz máslıhatynda «QazAgroKepil» AQ basqarma tóraǵasy Qaırat Maqaev málim etti, dep habarlaıdy «QazAqparat» HAA tilshisi.
«Agrarshylar úshin qolaıly jol, ıaǵnı nesıelerdi kepildendirý baǵyty jumysyn bastady. 2016 jylǵy 29 jeltoqsandaǵy QR Úkimetiniń qaýlysymen nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy bekitilgen bolatyn. «QazAgroKepil» AQ baǵdarlamanyń ekinshi baǵyty boıynsha, atap aıtqanda, nesıeler men shaǵyn nesıelerdi kepildendirý jumysyna atsalysady. Kóptegen sharýalardyń nesıe alý kezinde kepilge qoıatyn múlki jetispeı jatady. Kepildik múliktiń tómengi baǵasy nesıe alýǵa múmkindik bere bermeıdi. Sondyqtan memleket osy másele boıynsha - «kepildik alý» jolyn ázirledi», - deıdi Qaırat Maqaev.
Demek, nesıe alǵysy kelgen sharýaǵa kepildik bere otyryp, «QazAgroKepil» AQ nesıe alýshymen birge qaryzdyń qaıtarylýyna jaýapty bolmaq.
«Búginge deıin 180 sharýa kepildik alý múmkindigine ıe boldy. Ol fermerlerdiń 40 paıyzy - jumysyn jańadan bastaǵan kásipkerler. Berilgen jalpy kepildik somanyń mólsheri 1 mıllıard teńgege jetip otyr», - deıdi ol.
Kepildik alý qyzmetiniń tıimdiligi týrasynda «QazAgroKepil» AQ basqarma tóraǵasynyń orynbasary Qazbek Imanqulov keńirek aıtyp berdi.
Onyń aıtýynsha, kepildik alý júıesi boıynsha 18 mıllıon teńgege deıin nesıe alýǵa bolady. Sonymen birge, kompanııa jańadan kásip bastap jatqan kásipkerdiń alǵan nesıesiniń 85 paıyzyna deıin kepildendire alady. Al burynnan jumysy júrip turǵan kásipkerlerdiń alǵan nesıesiniń 50 paıyzy kepildendirilmek.
Qazbek Imanqulov óz sózinde Qazaqstannyń barlyq oblystary men Almaty, Semeı qalalarynda «QazAgroKepil» AQ-tyń ókildikteri jumys istep jatqanyn atap ótti.
«Kepildik alý joly mynadaı: Baǵdarlamaǵa qatysýshy «Agrarlyq nesıelik korporatsııamen» qarjylandyrylyp otyrǵan nesıelik seriktestikke barady. Eger kepilge qoıatyn múlki jetispegen jaǵdaıda nesıelik seriktestik oǵan kepildendirý arqyly nesıe berý týraly sheshim qabyldaıdy. Tıisti qujattar «QazAgroKepil» AQ qyzmetkerleri tekserip, tıisti sheshim shyǵarady. Osydan keıin ótinim berýshi, nesıelik seriktestik pen «QazAgroKepil» AQ arasynda úshjaqty kelisimge qol qoıylady», - deıdi Qazbek Imanqulov.
