Kepildik berý qory qurylys salýshylarǵa jerdi jalǵa alýǵa kómektespek
ASTANA. QazAqparat - Turǵyn úı qurylysyna kepildik berý qory qurylys jobalary úshin jer telimderin jalǵa alý merzimin arttyrý boıynsha qujattardy qarastyrý protsesine jaǵdaı jasamaq. Bul týraly elordada úlestik qurylys boıynsha konsýltatıvtik keńes otyrys barysynda tilshilerge atalǵan Qor basqarma tóraǵasynyń orynbasary Aıgúl Jumataeva málim etti, dep habarlaıdy QazAqparat.
«Búgin talqylanatyn máseleniń biri qurylysqa jer telimin alýǵa qatysty bolady. Qazirgi kezde Qordyń kepildigin alý úshin jer telimine ıe bolý kerek, ıaǵnı menshik ıesi nemese uzaq merzimdi jalǵa alý quqyǵy boıynsha jeri bolýy qajet. Jer kodeksi aıasynda qysqa merzimdi jalǵa alý quqyǵyndaǵy jer ýchaskesin kepilge usynýǵa tyıym salynǵan», - dep túsindirdi Jumataeva.
Onyń sózine qaraǵanda, jergilikti atqarýshy organdar jer telimderin qysqa merzimdi jalǵa alýǵa beredi.
«Osy turǵyda bizge jerdi paıdalaný quqyǵy merzimin uzartý úshin jergilikti atqarý organdaryna jolyǵý kerek. Bizde Astana men Almaty ákimdikterimen bekitilgen tıisti memorandýmdar bar. Atap aıtqanda, biz jalǵa alý merzimin arttyrý boıynsha qujattardy qarastyrý protsesin jyldamdatýǵa jaǵdaı jasamaqpyz»,- dedi A. Jumataeva.
Onyń atap ótýinshe, basty maqsat - Qor kepildigin alý úshin óńirlerdi barynsha kóptep tartý.
«Ózderińiz bilesizder, Qor kepildigi úlesker óziniń páterine mindetti túrde qol jetkizý úshin jaǵdaı jasaýǵa negizdelgen. ıAǵnı, qurylys salýshynyń múmkindigi sarqylsa, turǵyn úı qurylysy turalap qalmaıdy. Bul baǵyttaǵy jumystardyń barlyǵyn Qor óz moınyna alady. Búginde óńirlerde bizge ótinim jasap jatqan birneshe jobalardy qarastyryp jatyrmyz», - dedi Jumataeva.
Esterińizge sala keteıik, 2016 jylǵy 10 qazanda «Turǵyn úı qurylysyna úlestik qatysý týraly» Zań qabyldanyp, osy kúnnen bastap Turǵyn úı qurylysyna kepildik berý qory óz qyzmetin bastady.
Kepildik berý týraly shartqa qol qoıý úshin qurylys salýshylardyń barlyǵy sáıkes kelgen joq. Keıbir kompanııalar qajetti qujattamany tıisti deńgeıde qamtamasyz ete almady. Endi bireýleri qurylys salýshylardyń kepildik jarnanyń joǵary mólsherlemesin atap ótti. Degenmen, bir jyl ishinde Kepildik berý qory eki qaladaǵy salynyp jatqan úıler boıynsha eki kepildikti berdi. Bul Astana qalasyndaǵy «Mıllenıým park» turǵyn úı kesheniniń bir sektsııasy men Almaty qalasyndaǵy «Legenda» turǵyn úı kesheniniń birinshi kezeńi. Osylaısha, Qor kepildigi - osy turǵyn úılerden úles satyp alýǵa nıet bildirgen azamattarǵa qandaı jaǵdaı bolmasyn páterleriniń kiltin alýdy qamtamasyz etedi.
