Kepildik beriletin saqtandyrý sanattarynyń tizbesi keńeıtiledi - agenttik

NUR-SULTAN. QazAqparat – Zań jobasynda kepildik beriletin saqtandyrý klastarynyń tizbesi keńeıtiledi. Bul týraly Parlament Májilisiniń jalpy otyrysynda saqtandyrý naryǵyna qatysty zań jobasyn talqylaý kezinde QR Qarjy naryǵyn retteý jáne damytý agenttiginiń tóraıymy Mádına Ábilqasymova aıtty, dep habarlaıdy QazAqparat tilshisi.

«Zań jobasynda jiktelgen saqtandyrýdy damytý usynylady. Ol halyqty kásibı qatelikterden jáne kásipkerlerdiń sapasyz qyzmetterinen qorǵaý úshin qajet. Zań jobasynda agenttiktiń jiktelgen saqtandyrý sharttarynyń úlgilik talaptaryn bekitý ókilettigi kózdelgen. Bul talaptar negizinde salalyq mınıstrlikter jekelegen qyzmet túrlerin saqtandyrý boıynsha úlgilik sharttar ázirleıdi», - dedi M. Ábilqasymova.

Budan bólek ol kepildik beriletin saqtandyrý sanattaryna qatysty toqtaldy.

«Zań jobasynda kepildik beriletin saqtandyrý klastarynyń tizbesi keńeıtiledi. Búgingi kúni saqtandyrý tólemderine kepildik berý qory bes saqtandyrý túrine ǵana kepildik beredi. Qor kepildigi zań jobasynda usynylyp otyrǵan barlyq mindetti jáne áleýmettik mańyzdy saqtandyrý klastaryna, onyń ishinde birlesken zeınetaqy annýıtetteri men ómirdi saqtandyrý ónimderine qatysty qoldanylady», - dedi agenttik basshysy.

Aıta keteıik, búgin jalpy otyrysta «Qazaqstan Respýblıkasynyń keıbir zańnamalyq aktilerine saqtandyrý naryǵyn jáne baǵaly qaǵazdar naryǵyn retteý men damytý máseleleri boıynsha ózgerister men tolyqtyrýlar engizý týraly» zań jobasy birinshi oqylymda qaraldy.