Kepildendirilgen tegin medıtsınalyq kómek paketi qaıta qaralady - Erik Baıjúnisov
Basqarýshy dırektordyń aıtýynsha, Medıtsınalyq saqtandyrý qory Elbasynyń Qazaqstan halqyna Joldaýynda belgilegen mindetterdi atqarýǵa kirisip ketti. Bul rette Qor Joldaýdaǵy eń mańyzdy degen úsh mindetke basymdyq berip otyr.
«Atap aıtqanda, aqparattyq júıeler men mobıldik qosymshalardy damytý arqyly medıtsınalyq kómektiń qoljetimdiligi men tıimdiligin qamtamasyz etý. Bul rette byltyr qarasha aıynda qordyń mobıldik qosymshasy iske qosylǵan bolatyn. «MSQ: Halyqtyq baqylaý» atalatyn qosymsha elimizdegi aýrýhanalar men emhanalar qyzmetin baǵalaýǵa múmkindik beredi. Qosymshany uıaly telefonǵa júktep, kepildendirilgen tegin medıtsınalyq kómek sheńberinde qyzmet kórsetetin emdeý mekemeleriniń jumysyna baǵa berýge bolady», - dep atap ótedi Erik Baıjúnisov.
Onyń sózine qaraǵanda, qosymsha arqyly emhana/statsıonar qyzmeti boıynsha dárigerdiń qabyldaýyna kirýge ketken ýaqyt, kórsetilgen qyzmet sapasy, dáriger bergen emniń túsiniktiligi syndy ólshemder negizinde baǵalanady. Sonymen qatar, qosymshany paıdalanýshylar kez kelgen medıtsına uıymy jaıly pikirin erkin túrde jazyp qaldyra alady. Aldaǵy ýaqytta osy pikirler negizinde klınıkalardyń reıtıngi jasalady. Al, bul azamattarǵa elimizdegi eń úzdik degen emhanalar men klınıkalardy tańdaýǵa kómektesedi. «Halyqtyq baqylaý» qosymshasyn Android jáne iOS platformalarymen jumys isteıtin telefondarǵa ornatýǵa bolady.
«Ekinshi - kepildendirilgen tegin medıtsınalyq kómek kólemin ońtaılandyrý. Jalpy, bul qujatty Úkimet bekitedi. Biz óz usynystarymyzdy ázirlep ókiletti organǵa beremiz. Bir sózben aıtqanda, kepildendirilgen tegin medıtsınalyq kómek paketi qaıta qaralady deýge bolady. Bolashaqta memleket úshin tıimdiligi tómen ári shyǵyny kóp dıspanserlik júıeden bas tartyp, onyń ornyna sozylmaly syrqattardy qashyqtyqtan dıagnostıka jasaý jáne ambýlatorlyq emdeý tásilderin paıdalaný arqyly emdeý júıesine kóshý kózdelip otyr», - deıdi Qor basshysy.
Osyǵan baılanysty Qor aldaǵy eki jylda kepildendirilgen tegin medıtsınalyq kómek pen áleýmettik medıtsınalyq saqtandyrý paketterine kiretin qyzmet túrlerin irikteýmen aınalyspaq. Іrikteý barysynda medıtsınalyq qyzmetterge degen suranys pen olardyń tıimdiligi mindetti túrde eskeriledi.
«Úshinshi - statsıonarlyq kómekten profılaktıkaǵa jáne ózge de qyzmet túrlerine kóshý. Memleket basshysy bıylǵy Joldaýynda qazirgi densaýlyq saqtaý júıesiniń baǵasy qymbat bolyp keletin statsıonarlyq emge emes, aýrýdyń aldyn alýǵa den qoıýy kerektigin qadap aıtty. Bul óte durys. Sebebi, naýqastardyń 70 paıyzy dárigerge aýrýy ábden asqynǵannan keıin qaralady. Saldarynan azamattardyń shyǵyny men memleket qaltasynan shyǵatyn qarajat birneshe ese artady. Biz bolashaqta statsıonardy almastyratyn qyzmet túrlerin kóbeıtýge, soǵan basymdyq berýge kúsh salamyz. 2018 jyldan bastap kepildendirilgen tegin medıtsınalyq kómekke bólinetin qarajattyń 5 paıyzy osy qyzmet túrlerine jumsalatyn bolady. Sonymen qatar profılaktıkalyq is-sharalar aýqymyn edáýir arttyrý kózdelip otyr», - deıdi E. Baıjúnisov.
