Kepildendirilgen tegin medıtsınalyq kómek aıasynda qandaı qyzmetterdi alýǵa bolady

NUR-SULTAN. QazAqparat - QR Densaýlyq saqtaý mınıstrliginiń Mindetti áleýmettik medıtsınalyq saqtandyrýdy engizý jónindegi jobalyq keńsesiniń mamany Alına Álbekova qazaqstandyqtar tegin medıtsınalyq kómektiń kepildendirilgen kólemi aıasynda qandaı qyzmet túrlerin ala alatyny týraly aıtty, dep habarlaıdy QazAqparat tilshisi.

«Tegin medıtsınalyq kómektiń kepildendirilgen kólemi aıasynda áleýmettik-ekonomıkalyq jáne psıhologııalyq-áleýmettik jaǵdaılarǵa baılanysty adamnyń densaýlyǵyna aıtarlyqtaı qaýip tóngen jaǵdaıda medıtsınalyq-áleýmettik jáne psıhologııalyq kómek kórsetiledi. Sondaı-aq, medıtsınalyq kómektiń kepildendirilgen kólemi aıasynda júkti áıelder men 18 jasqa deıingi balalarǵa medıtsınalyq-genetıkalyq keńes berý, psıhoaktıvti zattarǵa medıtsınalyq kýálandyrýdan ótý jáne medıtsınalyq-áleýmettik saraptama úshin qujattar tegin beriledi», - dedi Alına Álbekova onlaın dáris barysynda.

Onyń aıtýynsha, MÁMS júıesi engizilgenine qaramastan, tegin medıtsınalyq kómektiń kepildendirilgen kólemi aıasynda kórsetiletin konsýltatıvti-dıagnostıkalyq qyzmet túrleri kóp.

«Kóbi barlyq medıtsınalyq taldaý jumysy MÁMS-ke kirgizilgenin aıtady. Shyn máninde, olaı emes. MÁMS júıesi engizilgenine qaramastan, tegin medıtsınalyq kómektiń kepildendirilgen kólemi aıasynda kórsetiletin konsýltatıvti-dıagnostıkalyq qyzmet túrleri kóp. Zerthanalyq zertteý jumystarynyń, dıagnostıkalyq zertteýlerdiń basym bóligi tegin medıtsınalyq kómektiń kepildendirilgen kólemi aıasynda júzege asyrylady. Mysal retinde qannyń bıohımııalyq taldaýyn aıtýǵa bolady. Bul taldaý arqyly baýyr, búırek, uıqy bezi, ót qabynyń qalaı jumys istep turǵanyn anyqtap, qandaı mıkroelementterdi qajet etetinin anyqtaýǵa bolady», - deıdi maman.

Sondaı-aq, tegin medıtsınalyq kómektiń kepildendirilgen kólemi aıasynda flıýorografııa, spırografııa sııaqty zertteý ádisterin qoladnýǵa bolady.