Kepildendirilgen azyq bazasy joq mal sharýashylyǵy sýbektilerin memlekettik qoldaý orynsyz - mınıstr

NUR-SULTAN. QazAqparat – Kepildendirilgen azyq bazasynsyz jumys isteıtin mal sharýashylyǵy sýbektilerin memlekettik qoldaý orynsyz. Bul týraly búgin Úkimet otyrysynda QR Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

«Mal sharýashylyǵyn damytýdyń turaqtylyǵy men ornyqtylyǵyn arttyrý úshin birqatar is-shara qabyldanady. Eń aldymen - jem-shóp óndirisin damytý jónindegi jol kartasynda kózdelgen barlyq josparlanǵan is-sharalardyń oryndalýyn qamtamasyz etý. Mal sharýashylyǵy boıynsha sýbsıdııa alýshylar úshin sýbsıdııalaý tetigin jetildirý jónindegi is-sharalar aıasynda jemshóp óndirisi boıynsha qýattardyń jáne aýyspaly egiste jem-shóp alqabynyń bolýy boıynsha mindetti talaptar engiziletin bolady. Kepildendirilgen azyq bazasynsyz jumys isteıtin mal sharýashylyǵy sýbektilerin memlekettik qoldaý orynsyz dep sanaımyz», - dedi mınıstr.

Onyń atap ótýinshe, baqylaýshy organdardyń usynymdaryna sáıkes sýbsıdııalaýdyń qazirgi kóptegen baǵyttary júıelendiriledi jáne ońtaılandyrylady.

«Bul rette ǵylymı negizdelgen normalardy eskere otyryp, sýbsıdııalaý normatıvteri qaıta qaralatyn bolady», - dedi Erbol Qarashókeev.