Kenjesh Sársekenova: Sportshylarymyz jeńis tuǵyrynan kórinedi dep senemiz

ASTANA. KAZINFORM – QR konkımen júgirý sportynan memlekettik jattyqtyrýshy Kenjesh Sársekenova Qytaıdyń Harbın qalasynda ótetin IX qysqy Azııa oıyndaryna qatysatyn qazaqstandyq sportshylarǵa sáttilik tiledi.

Memlekettik jattyqtyrýshy Kazinform tilshisine bergen suhbatynda konkımen júgirý sportynan qysqy Azııa oıyndaryna elimizdiń eń myqty sportshylary bara jatqanyn aıtty.

– Konkımen júgirýden el quramasy 10 er sportshy jáne 10 qyzdan quraldy. 4 jylda bir keletin qurlyqtyq dodaǵa elimizdiń eń myqty sportshylary bara jatyr. Árıne, basqa eldiń de myqty sportshylary keletini sózsiz. Alaıda biz sportshylarymyzǵa senemiz, kóbirek medal jeńip alýdan úmittimiz, - dedi Sársekenova.

Sondaı-aq, memlekettik jattyqtyrýshy júldeden úmitti birneshe sportshynyń atyn atady.

– Sprınt jarysynda Evgenıı Koshkın jáne Altaı Jardembekuly degen sportshylarymyz bar. Sonymen qatar, komandalyq sprınt jáne komandalyq iz qýý jarystarynan júlde alamyz dep senemiz, - dedi ol.

Aıta keteıik, Kenjesh Sársekenova jasóspirim qyzdar arasynda eki márte Qazaqstan jáne álemdik dodanyń jeńimpazy. Ol 1994 jyly Lıllehammer (Norvegııa), 1998 jyly Nagano (Japonııa) qysqy Olımpıada oıyndaryna, Ońtústik Koreıanyń Kanvon qalasynda ótken IV qysqy Azııa oıyndaryna (1999 jyl) qatysqan.

Eske salsaq, IX qysqy Azııa oıyndary 2025 jyldyń 7-14 aqpany aralyǵynda Qytaı Halyq Respýblıkasy Heılýntszıan provıntsııasynyń Harbın qalasynda ótedi. Sportshylar 11 sport túri boıynsha 64 medal jıyntyǵyn sarapqa salady. 

Osyǵan deıin habarlaǵanymyzdaı, Elordadaǵy Qazaqstan jeńil atletıka sport kesheninde IX qysqy Azııa oıyndaryna Qazaqstan ulttyq quramasynyń sportshylaryn saltanatty shyǵaryp salý rásimi ótti.