Kenjekól turǵyny úıiniń tóbesinde 10 jyldan beri Kók tý jelbirep tur - Pavlodar oblysy
Kók týymyzdy qasterlep, óz úıiniń tóbesine ilip qoıǵan Ersaıyn Shapın árbir qazaqstandyq ulttyq rámizderdi qurmettep, olardy boıtumaryndaı qasterleýi kerek ekenin aıtady.
- Osydan 10 jyl buryn Aqqýly aýdany, Merǵalym eldi mekeninen Kenjekól aýylyna qonys aýdardym, - deıdi Ersaıyn Shapın. - Alǵash úıimniń irgetasyn qalaı bastaǵanda «osydan baspanam salynyp bitse, tóbesine Kók baıraǵymdy ilip qoıamyn» dep armandaǵan edim. Qazir sol arman oryndaldy. Biraq, bul kúnge jetý úshin biraz kúresýge týra keldi. Aqyr sońynda Ata Zańymyzda ruqsat etilgenin dáleldegennen keıin ǵana kedergisiz úıimniń tóbesine ornata aldym. Kózim jumylǵansha, Kók týym tóbemde jelbirep turady.
Aýyl turǵyny 70-80 myń teńgesin ár 2 aı saıyn aıyrbastap otyratyn Týǵa jumsaıtynyn aıtady.
- Qazaq «Tárbıe - talbesikten bastalady» dep beker aıtpaǵan ǵoı. Áýeli, ózgege patrıottyq týraly áńgime aıtpas buryn balalarymnyń boıyna otansúıgishtik qasıetti sińirýim kerek. Ol úshin tek Týymyzdy ǵana emes, Ánuranymyz ben Eltańbamyz týraly da jıi aıtýymyz shart. Osy rette meni qynjyltatyn bir nárse bar. Ol – kóshede shashylyp jatqan tıyndardy kóre tura, mán bermeı ótip ketetinderdi kóz kórip júr. Aıtpaǵym, 1 teńgelik tıyn bolsyn, 100 teńgelik bolsyn, jerde jatsa - kóterińiz. Oǵan aqsha dep emes, Memlekettik Eltańbam dep qarańyz. Menińshe, elin-jerin, Otanyn súıetin ár adam bul jaǵdaıǵa beı-jaı qaramaıdy dep oılaımyn, - deıdi ol.
