Kenjekól aýyly mańynda uzyndyǵy 700 metr ekinshi bóget salynyp jatyr - Pvvlodar
ASTANA. QazAqparat - Pavlodar qalasyna qarasty Kenjekól aýylynda uzyndyǵy 700 metr bolatyn ekinshi sý bógeti salynyp jatyr, dep habarlaıdy pavlodarnews.kz.
Búgin Pavlodar qalalyq máslıhattyń depýtattary Kenjekól aýylyna baryp, tasqyn sýdyń aldyn alý jumystarymen tanysty. Kenjekól aýylynyń ákimi Asylhan Mankeevtiń sózinshe, sý tasqynynyń aldyn alý úshin jedel mobıldi top qurylǵan. - Arnaıy toptyń kezekshilik telefondary táýlik boıy jumys isteıdi. Qandaı da bir tótenshe jaǵdaı týraly habar tússe, birden iske kirisemiz. Jedel top quramyna 12 adam jáne jeti tehnıka jumyldyrylǵan. Onyń ekeýi qar shyǵarýǵa jáne ekeýi jaıylǵan sýdy sorýǵa arnalǵan kólikter. Qar shyǵarý jumystary aqpan aıynyń aıaǵynda bastaldy. Qazirgi kúnge deıin aýyl ishinen 35 tekshe metr qar jáne 645 tekshe metr sý shyǵarylyp, arnaıy orynǵa tógildi. Oblystyq tótenshe jaǵdaılar departamentiniń mamandary da bizdiń jaǵdaıdy turaqty baqylap otyr, - deıdi Asylhan Mankeev.
Aıta keteıik, buǵan deıin aýyl mańyna uzyndyǵy 1,2 shaqyrym, bıiktigi 2 metr bolatyn bir damba salynǵan bolatyn. Qazirgi tańda uzyndyǵy 700 metrlik taǵy bir sý bógetiniń jumysy júrip jatyr. Aldaǵy bir-eki kúnniń ishinde ony aıaqtaý josparlanǵan.
