Kenjeǵalı Saǵadıev qazaqstandyq parlamentarızmniń damýyna zor úles qosty - Nyǵmatýlın

NUR-SULTAN. QazAqparat - Májilis Tóraǵasy Nurlan Nyǵmatýlın memleket jáne qoǵam qaıratkeri, akademık, Qazaqstan Respýblıkasy Parlament Májilisiniń III jáne IV shaqyrylym depýtaty Kenjeǵalı Ábenuly Saǵadıevtiń otbasy men jaqyndaryna kóńil aıtty. Bul jóninde Májilistiń baspasóz qyzmetine silteme jasap QazAqparat habarlaıdy.

Nurlan Nyǵmatýlın Májilis depýtattarynyń atynan marqumnyń otbasyna kóńil aıtty.

«Májilis depýtattarynyń jáne óz atymnan akademık K.Á. Saǵadıevtiń otbasyna kóńil aıtamyn. Halyqtyń qurmetine bólengen birtýar tulǵa - Kenjeǵalı Ábenuly Táýelsiz Qazaqstannyń, onyń ishinde parlamentarızmniń damýyna erekshe úles qosty. Onyń jarqyn beınesi máńgi esimizde saqtalady» - dep jazdy Májilis Tóraǵasy Twitter paraqshasyna.

Sondaı-aq, Nurlan Nyǵmatýlın Kenjeǵalı Saǵadıevtiń elimizdiń ǵylym salasyna eleýli úles qosyp, óziniń eńbek jolynda búgingi jas urpaqqa úlgi-ónege bolar aıqyn iz qaldyrǵanyn atap ótti.