Kentaýlyq ýchaskelik polıtsııa ınspektory qarýly kúdiktini qylmys ústinde quryqtady

TÚRKІSTAN. QazAqparat – Túrkistan oblysynda Kentaý qalasynyń ýchaskelik polıtsııa ınspektory pyshaqpen qarýlanǵan kúdiktini qylmys ústinde qolǵa túsirdi, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.

Baspasóz qyzmetiniń málimetterine qaraǵanda, oqıǵa 2021 jyldyń 12 naýryzynan 13 naýryzyna qaraǵan túni saǵat 23:30 shamasynda bolǵan. Bul oqıǵa týraly onyń kýágeri Túrkistan turǵyny Jasýr Jumabaı atty azamat Instagram paraqshasyna jazǵan.

Onyń oqıǵany baıandaýynsha, Jasýr túnde kóligimen kele jatyp toptalyp turǵan adamdardy kóredi. Ne bolyp jatqanyn bilmek bolyp kóliginen túsken Túrkistan turǵyny joldyń ortasynda bir jigittiń ekinshisiniń moınyna pyshaq suǵyp, ústine otyryp alym, jibermeı turǵanyn kóredi. Al pyshaqtalǵan jigitti qutqarmaq bolǵandarǵa kúdikti pyshaǵyn kezenedi. Turǵyndar polıtsııaǵa habarlasyp jatqanda kóligimen kelip jetken polıtsııa qyzmetkeri kúdiktiniń pyshaǵyna qaramastan qolyn burap, zalalsyzdandyrady.

Qazirgi tańda ýchaskelik polıtseı quryqtaǵan kúdikti qamaýda, oǵan qatysty Kentaý QPB-da QR QK-niń 99-babynyń 1-bóligi «Adam óltirý» boıynsha sotqa deıingi tergep-tekserý amaldary júrgizilýde.