Kentaýlyq kásipker qalalyq aýrýhanaǵa ottegi stantsııasyn syıǵa tartty
KENTAÝ. QazAqparat - Túrkistan oblysy Kentaý qalasynda kásipker Bekbolat Bekenovtiń tikeleı demeýshiligimen ottegi stantsııasy salyndy. Táýligine 250 ottegi ballonyn toltyrýǵa qaýqarly stantsııanyń jalpy quny 60 mln teńgeni quraıdy, dep habarlaıdy QazAqparat tilshisi.
Qala ákimi Daýren Mahajanov ortalyq aýrýhanaǵa ornalastyrylǵan jańa stantsııanyń jaı-kúıimen tanysyp, jomarttyq tanytqan kentaýlyq azamatqa alǵysyn jetkizdi.
«Álemdi jaýlaǵan koronavırýs indeti bizdiń elimizdi de aınalyp ótpedi. Bul jaǵdaı halyqqa aıtarlyqtaı qıyndyqtar alyp kelgeni barshaǵa aıan. Mine, osyndaı qıyndyqtardy eńserý úshin memleket tarapynan ǵana emes, jekelegen jany jomart azamattardyń demeýshiligimen emhana men aýrýhanalarymyzǵa kóptegen kómekter berilip jatyr. Halyqtyń qamyn oılaǵan osyndaı azamattarymyzǵa alǵystan basqa aıtarymyz joq», – dedi qala ákimi.
Aıta keteıik, qazirgi tańda Kentaý kalalyq aýrýhanasynda «COVID-19» indetin jáne vırýsty pnevmonııa aýrýyna shaldyqqan naýqastar joq. Degenmen qaladaǵy ınfektsııalyq statsıonar naýqastardy qabyldaýǵa daıyn tur. Іndettiń kelesi tolqynyna daıyndyq maqsatynda jospar túzilip, 580 tósek oryn ashýǵa jumystar júrgizilgen. Sondaı-aq, aýrýhanada koronovırýsty ınfektsııa men vırýsty pnevmonııany emdeýge 2 aıǵa jeterlik dári-dármek qory jınaqtalǵan.
