Kentaýlyq fabrıka jylyna 16 mıllıonnan astam jumyrtqa óndiredi
NUR-SULTAN. QazAqparat - Túrkistan oblysynyń ákimi Ómirzaq Shókeev jumys saparymen Kentaý qalasyna bardy, dep habarlaıdy oblystyq ákimdiktiń baspasóz qyzmeti.
Onda áýeli «ıAssy-qus» fabrıkasyna aıaldady. Sharýa qojalyq 2016 jyly jumysyn bastaǵan. Negizinen jumyrtqa ónimin óndirýmen aınalysady. Fabrıkada 18 adam turaqty jumyspen qamtylǵan. Ortasha jalaqy 45000-50000 teńge aralyǵynda. Qojalyqta 4 jumyrtqalaıtyn tseh pen qurama jem saqtaıtyn qoıma bar. Jobanyń quny – 198 mln. teńge. Qazirgi tańda gollandııalyq «Labraýn» porodasynan – 50 myń dana taýyq bar. Fabrıkanyń aılyq qýattylyǵy – 1 350 000 dana jumyrtqa, al jylyna 16 200 000 dana jumyrtqa shyǵarýǵa qaýqarly.
Qojalyq jumysymen tanysqan oblys basshysy ónim kólemin arttyra túsip, jumys ornyn kóbeıtý qajettigin aıtty. Sondaı-aq, Ómirzaq Estaıuly Kentaý qalasyndaǵy qurylysy jańadan bastalǵan 10 kópqabatty turǵyn úılerdiń qurylysymen tanysty.
Jobalaýshy mekeme «Sunkar Byilding» JShS bolsa, bas merdiger: «Nysh Er» JShS, «Aq jol» JShS, «Al-Dekeı» JShS, «Qurylys Moldashev E» JK. Bes qabattan turatyn on úıde jalpy sany – 600 páter bar. Olardyń jalpy aýmaǵy – 33 240 sharshy metr. Aǵymdaǵy jyldyń mamyr aıynda qurylysy bastalǵan nysandar 2020 jyldyń maýsym aıynda tolyq paıdalanýǵa berilmek. Nátıjesinde 600 otbasy baspanaly bolady.
Óz kezeginde aımaq basshysy qurylysty ýaqytyly aıaqtap, turǵyndarǵa tapsyrý kerektigin atap ótti.
Odan soń Kentaý qalalyq «Jastarǵa qyzmet kórsetý ortalyǵynyń» ǵımaratynda oblys ákiminiń tóraǵalyǵymen jıyn ótti. Kezdesýde Kentaý qalasynyń ákimi Dáýren Mahajanov «Kentaý qalasynyń 2019-2022 jyldarǵa keshendi damytý» týraly baıandady. Sonymen qatar, memlekettik-jekeshelik áriptestik baǵdarlamasy arqyly Kentaý qalasyn keshendi damytý jospary tanystyrylyp, aldaǵy ýaqytta júzege asýy qaraldy. Kentaý qalasyndaǵy atqarylyp jatqan jáne aldaǵy atqarylatyn josparlarmen tanysqan oblys ákimi Ómirzaq Estaıuly josparlardy qoldaıtynyn atap, aldaǵy kezdesýde jumysty slaıd arqyly emes, istiń basynda turyp kórsetýdi qolǵa alý qajettigin eskertti.
«Kentaý Túrkistan oblysynyń ortalyǵyna shekaralas jatqandyqtan Túrkistanmen birge kórkeıetin qala. Sondyqtan árbir atqarylǵan jumys sapaly jáne júıeli túrde atqarylýy kerek», – dedi aımaq basshysy Ó. Shókeev.
