Kentaýlyq eki turǵynnyń eregisi kisi ólimimen aıaqtaldy
TÚRKІSTAN. QazAqparat – Esikten ótýge talasqan kentaýlyq eki turǵynnyń eregisi kisi ólimimen aıaqtaldy, dep habarlaıdy QazAqparat tilshisi.
Tártip saqshylary taratqan málimetke súıensek, eki er adam dúken esiginen kirer sátte ıyq tiresip, sol úshin sózge kelip qalǵan. Sodan jábirlenýshi oqıǵa ornynan shyǵyp ketip, birer mınýttardan soń atalǵan dúkenge qaıta kelip, aradaǵy daýdy sheshpek bolǵan. Janjal odan ári Kentaý qalasyna kireberis mańdaǵy qurylysy aıaqtalmaǵan nysan aýmaǵynda jalǵasqan. Ekeýi tóbelesip, sońynda kúdikti jábirlenýshini pyshaqtap, qylmys ornynan qashyp ketken.
«Jedel-izdestirý is-sharalarynyń nátıjesinde Krımınaldyq polıtsııa qyzmetkerleri bir táýlikten keıin kúdiktini Almaty qalasynan ustady. Ol buryn tonaý deregimen sottalǵan Kentaý qalasynyń turǵyny bolyp shyqty. Qazirgi tańda atalǵan jaıt boıynsha sotqa deıingi tergeý amaldary júrgizilýde. Zattaı dálel retinde pyshaq alyndy. Kúdikti qamaýda», - delingen Túrkistan oblysy polıtsııa departamentiniń baspasóz qyzmeti taratqan habarlamada.
