Kentaýǵa jylý berile bastady

Kentaýǵa jylý berile bastady, dep habarlaıdy Kazinform. 

Túrkistan oblysynyń Kentaý qalasyna jylý berile bastady. Bıyl jylý energo ortalyǵyndaǵy 8 qazandyqtyń 4-eýi jóndeýden ótse, qalǵan 4-eýine qaıta qurý jumystary júrgizilip jatyr.

«Eki qazandyqqa «BI group» kompanııasy, al taǵy eki qazandyqqa «EM-Holdıng» JShS demeýshilik jasap, jóndeýden ótkizip berdi. Qazir 4 qazandyqqa qaıta qurý jumystary júrgizilip jatyr. Jyl sońyna deıin 2 qazandyq, al kelesi jyly taǵy 2 qazandyqtaǵy qaıta qurý jumystary aıaqtalady dep josparlap otyrmyz», - dedi «Kentaý servıs» MKK dırektory Serik Sımtıkov.

Qazir jylý energo ortalyǵynda 2 qazandyq jumys istep tur. Eki qazandyq rezevke qoıylǵan. Qaladaǵy kóp qabatty turǵyn úıler men áleýmettik nysandardy kezeń-kezeńimen iske qosý jumystary júrip jatyr. Mamandar 10 kún kóleminde qalaǵa tolyqqandy jylý beriletin bolady dep otyr. Sondaı-aq avarııalyq qyzmet júıesi de iske qosylǵan. Ondaǵy jumysshylar turǵyn úılerden shyqqan aqaýlarǵa shaqyrtýlar boıynsha baryp, sý jibergen qubyrdy qalpyna keltirip jatyr.

Sonymen qatar ortalyqtaǵy jylý júıelerin jáne qosalqy qondyrǵylaryn qaıta qurý jumystary da qatar júrgizildi. Qaladaǵy tozyǵy jetken 6,6 shaqyrym magıstraldyq jylý júıeleriniń 4,7 shaqyrymy qaıta qurýdan ótti. Al qalǵan 1,9 shaqyrym men 4 keri sorǵy stantsııasyn jóndeý jumysy kelesi jyly jasalmaq.

Mamandardyń sózinshe, keleshekte jylý energııa ortalyǵyn gazǵa aýystyrý kózdelgen. Osyǵan oraı jetkizýshi gaz qubyrynyń qurylysyna JSQ ázirlenip, memlekettik saraptama qorytyndysy alynǵan. Bul gaz qubyry birneshe kúrdeli máselelerdi sheshpek. Atap aıtqanda, JEO men Hantaǵy aýylyn gazben qamtamasyz etý, Indýstrıaldy aımaq, Kentaý baıytý kombınaty men Kentaý ekskovator zaýyttaryna arnaıy qosylý núkteleri qarastyrylǵan.

Jalpy, Kentaýdaǵy JEO 14 000 astam abonentti jylýmen qamtamasyz etedi. Onyń ishinde 347 kópqabatty úı, 106 bıýdjettik mekeme, 401 kommertsııalyq nysan jáne 2229 jeke sektordaǵy úı bar.

Aıta keteıik, budan aldyn Kentaýdaǵy jylý ortalyǵy jabdyqtarynyń 85 paıyzy tozǵanyn jazǵan bolatynbyz.