Kentaýdy turaqty jylýmen qamtýǵa 3 qazandyq jetkilikti - ákimdik
TÚRKІSTAN. KAZINFORM - Kentaýda 4 jylý qazandyǵyn jańartý jumystary aıaqtaldy. Al, taǵy eki qazandyqtaǵy jóndeý jumystary jyl sońyna deıin jalǵasady. Bul týraly Kentaý qalasynyń ákimdigi málimdedi.
Búginde jylý energo ortalyqtaǵy №8, 9, 10, 11 qazandyqtardyń jumystary tolyq aıaqtaldy. Qalǵan №7, 12 qazandyqta qurylys-montaj jumystary kestege sáıkes atqarylyp jatyr. Budan bólek, №5,6 qazandyqqa aǵymdaǵy jóndeý jumystary júrgizilgen.
«Búginde jylytý maýsymyna 6 qazandyq daıyn. Tórt qazandyq qaıta qurýdan ótse, eki qazandyq aǵymdaǵy jóndeýden ótti. Kentaý qalasyn turaqty jylýmen qamtý úshin 3 qazandyq jetkilikti, 3 qazandyq rezervte bolady», - delingen Kentaý qalasynyń ákimdigi taratqan aqparatta.
Qazir jylý ortalyǵynyń qoımasynda 13,7 myń tonna kómir bar. Odan bólek, 44 myń tonna kómir tasymaldaýǵa kelisimshart túzilip, tasymaldaý jumystary bastalǵan. Sondaı-aq, Kentaý qalasyndaǵy 6,6 shaqyrym magıstraldy jylý jelileri qaıta jańartyldy. 14,5 shaqyrym jylý jelilerin rekonstrýktsııalaý boıynsha joba ázirlenip, bıýdjettik ótinim mınıstrlikke usynylǵan.
Búgin Túrkistan oblysynyń ákimi Darhan Satybaldy Kentaý qalasyndaǵy jylý ortalyǵyna baryp, jóndeý jáne qurylys jumystaryn taǵy da baqylady. Qala ákimi, jaýapty basqarma ókilderi men merdiger kompanııa basshylarynyń esepterin tyńdady.
«Jylytý maýsymynyń bastalýyna az ýaqyt qaldy. Jumysty sapaly atqarý mańyzdy. Eldiń senimin aqtaý kerek. Árbir qazandyqtaǵy jumysty júıelep, jylytý maýsymyna daıyndańyzdar. Másele qatań baqylaýda tur», – degen Darhan Satybaldy jaýaptylarǵa naqty tapsyrmalar júktedi.
Aıta keteıik, budan buryn Kentaýda jylý maýsymy erte bastalatyndyǵyn jazǵan bolatynbyz.
