Kentaý ekologııalyq aımaq tanylsa, 100 myń adamnyń ómir súrý sapasy jaqsarady – depýtat
TÚRKІSTAN. KAZINFORM – Kentaý qalasyndaǵy ekologııalyq jaǵdaı kúnnen kúnge kúsheıip keledi. Qazirgi kezde qaladaǵy aýa men sýdyń lastanýynan qala turǵyndarynyń arasynda onkologııalyq aýrýlar da asqyna túsken. Bul týraly Qazaqstan Parlamenti Májilisiniń depýtaty Ulasbek Sádibekov Kentaý qalasynda ótken jıynda málimdedi.
Kentaý qalasynda 2020 jyly onkologııalyq aýrýmen naýqastanyp, qaıtys bolǵandardyń kórsetkishi 49,5 bolsa, 2021 jyly bul kórsetkish 51,5-ke kóbeıgen. Al, 2022 jyly 62,4 bolyp otyr.
«Jalpy, bul - óte úlken, aýqymdy másele. Sebebi, Kentaý qalasyndaǵy ekologııalyq jaǵdaı kúnnen kúnge kúsheıip keledi. Bul dabyl qaǵarlyq jaǵdaı dep bilemin. Bir tańqalarlyǵy, Kentaý qalasyna qarasty Qusshy ata aýylyndaǵy joldyń arǵy beti ekologııalyq aımaqqa jatsa, bergi beti ekologııalyq aımaq dep eseptelmeıdi. Barlyq turǵynnyń jutyp otyrǵany bir aýa. Báıdibek aýdanynda da dál osyndaı jaǵdaı bar. Qyzyl kópir atalyp ketken Ekpindi aýylynyń Arys aımaǵyna qarasty bóligi ekologııalyq aımaqqa enedi de, Báıdibek bóligi bul artyqshylyqty ala almaı keledi. Bul másele de ońtaıly sheshýdi qajet etedi», - dedi Ulasbek Sádibekov.
Kentaý qalasyn ekologııalyq aımaqqa endirý jaıy boıynsha jumystardyń qolǵa alynǵanyna da 10 jylǵa jýyq ýaqyt bolǵan. Alǵash ret búgingi senator Álı Ábdikárimuly Bektaev Parlamentte Kentaý qalasyn ekologııalyq aımaqqa endirý qajettin aıtyp, jergilikti halyqtyń janaıqaıyn Úkimetke jetkizgen bolatyn. Sodan beri másele ózektiligin joıǵan joq.
«Sońǵy jyldary Kentaýdyń jaǵdaıyn kún tártibine qaıta alyp shyqtyq. Úkimetke jaǵdaıdy túsindirip, 100 myńǵa jýyq halyqty tolǵandyrǵan jaıt ekendigine kóz jetkizdik. Sodan qanshama jyldan beri toqtap turǵan «seń» qozǵalyp, nazar aýdaryldy. Búginde árbir mınıstrlik pen komıtet tarapynan jumystar júrip jatyr. Arada túsinbeýshilikter men suraqtar da týyndaýda. Sondyqtan, atalǵan máselege qatysty sala mamandary birigip, máseleni Kentaý qalasynda halyqpen birge qarap, talqylaýdan ótkizdik. «Kentaý qalasy men Báıdibek aýdanynyń ekologııalyq jaǵdaıy» jónindegi arnaıy májiliske Ekologııa jáne tabıǵı resýrstar mınıstrligine qarasty Ekologııalyq saıasat departamentinen, Ekologııalyq retteý jáne baqylaý komıtetinen, Eńbek jáne áleýmettik qorǵaý mınıstrliginiń Áleýmettik kómek departamentinen jáne Túrkistan oblysy ákimdiginen sala mamandary men jergilikti basqarma basshylary jáne ákimder, máslıhat depýtattary men aqsaqaldar, zııaly qaýym ókilderi qatysty. Mınıstrlik ókilderi Kentaý qalasyn ekologııalyq aımaqqa endirý maqsatynda júzege asyp jatqan jumystarmen tanystyrdy. Jalpy, biz Kentaýdy ekologııalyq aımaq dep taný arqyly 100 myń halyqtyń ómir súrý sapasyn jaqsarta alamyz», - dedi Ulasbek Sádibekov.
