Kentaýdan Qulsaryǵa sálem: 11 jastaǵy qyzdyń qobdıshasy murajaıǵa qoıylatyn boldy
TÚRKІSTAN. KAZINFORM - Jyl boıy jınaǵan qarajatyn qobdıshaǵa salyp, Qulsaryǵa kómek retinde bergen 11 jastaǵy kentaýlyq qyzdyń sálemdemesin qulsarylyqtar murajaıǵa qoıatyn boldy.
Sý tasqynynan zardap shekken aımaqtarǵa Kentaý qalasynan jiberilgen gýmanıtarlyq kómek jetti. Atap aıtar bolsaq, kúndelikti tutyný taýarlary men azyq-túlik tıegen júk kólikterin qulsarylyqtar kútip aldy. Sonyń ishinde 11 jastaǵy Gaýhar Sháımerden men 7 jastaǵy Jambyl Jiger joldaǵan qarjy jınaqtaıtyn qobdıshalar da bar. Qoǵam belsendisi Azamat Tórehan Gaýhardyń qulsarylyq zamandastaryna jazǵan hatyn oqyp berdi. «Qulsaryǵa Kentaýdan sálem!» dep bastalatyn jazbada jasóspirim sý tasqynynan zardap shekken aımaqtaǵy aýyr ahýaldy kórip qatty ýaıymdaǵanyn aıtqan.
«Men Sizderdiń aýyr jaǵdaılaryńyzdy kórip qatty ýaıymdadym. Sizder qazaqtyń batyr uldary men qyzdarysyzdar. Sondyqtan bul qıyndyqtan aman-esen ótetinderińizge senimdimin. Meniń jınap júrgen aqsham bar edi. Sony sizderge beremin. Aqsha jınaıtyn kıiz úıdiń ishinde qansha qarajat jınalǵanyn bilmeımin. Qansha bolsa da barlyǵy Sizderdiki. Biz Sizdermen birgemiz», - delingen hatta.
Endi bul hat pen qos jetkinshektiń qobdıshasy arnaıy murajaıǵa qoıylatyn boldy. Bul usynysty jergilikti aqsaqaldar da qoldaǵan.
«Bul – tarıhı oqıǵa. Jastarǵa úlgi bolady dep oılaımyn. Qulsarydaǵy ortalyq murajaıdy sý alyp ketken. Sondyqtan jumys istemeı tur. Іske qosylǵan kezde Gaýhar Sháımerden men Jambyl Jigerdiń amanatyn sonda qoıatyn bolamyz», - dedi qoǵam belsendisi Azamat Tórehan.
Aıta keteıik, buǵan deıin 11 jastaǵy kentaýlyq qyz jyl boıy jınaǵan qarajatyn Qulsaryǵa kómek retinde bergenin jazǵan bolatynbyz.
