Kentaýdaǵy jylý ortalyǵy jabdyqtarynyń 85 paıyzy tozǵan

TÚRKІSTAN. QazAqparat - Kentaýdaǵy jylý ortalyǵy qalypty jaǵdaıda jumys istep tur, dep habarlaıdy QazAqparat tilshisi.

Kentaý – Túrkistan oblysyndaǵy monoqalanyń biri. Munda 100 myńnan astam halyq qonystanǵan. Qalada 347 kóp qabatty turǵyn úı bar. Olardyń barshasy qaladaǵy ortalyqtandyrylǵan №5 jylý energo ortalyǵy arqyly jylytylady. Sondaı-aq, 2000-nan astam jeke sektordaǵy turǵyn úıler men 106 bıýdjettik mekeme, 441 kommertsııalyq nysan atalǵan ortalyqtan jylý alyp otyr.

«Kentaý qalasyndaǵy №5 jylý energııa ortalyǵy qalypty rejımde jumys isteýde. Jylý berý temperatýralyq keste boıynsha júzege asyp jatyr. Ortalyqtandyrylǵan jylýǵa qosylǵan 14 myń abonent bar. Barlyǵy tolyq jylý júıesimen qamtamasyz etilgen», - dedi Kentaý qalasy ákimniń orynbasary Qýanysh Ǵalymjanuly.

2022-2023 jyldary jylytý maýsymyn sapaly jáne úzilissiz ótkizý maqsatynda oblys ákimdiginiń qoldaýymen, №5 JEO negizgi jáne qosalqy qondyrǵylaryn, №7,8,11,12 qazandyqtaryn, №3 týrbogeneratordy aǵymdaǵy jóndeýge qajetti qarjy qarastyrylǵan. Qazirgi ýaqytta aǵymdaǵy jóndeý boıynsha barlyq jumystar tolyǵymen aıaqtalǵan.

– Jylý energııa ortalyǵy tolyq jumys rejıminde qyzmetin atqarýda. Qala turǵyndarynan «jylý joq» degen shaǵymdar azaıdy. Jekelegen ótinishter boıynsha jylý ınspektsııasy, ishki oram júıesi, retteý tobynyń qyzmeti tıisti jumystaryn istep jatyr. Sondaı-aq, turǵyndarmen túsindirme jumystary turaqty júrgizilýde, - dedi «Kentaý Servıs» MKK dırektory Áshirhan Tóleý.

Sonymen qatar, 2022-2023 jyldardaǵy jylý maýsymyna qajetti 90 000 tonna qatty otyn (kómir), 700 tonna suıyq otyn (mazýt) jáne 20 tonna dızelge kelisimshart túzilgen. Ol kestege sáıkes jetkizilýde.

Aıta keteıik, Kentaýdaǵy №5 jylý energo ortalyq 1934 jyly salynǵan. Mamandardyń sózinshe negizgi materıaldyq jabdyqtardyń 85 paıyzy tozǵan.