Kentaýdaǵy jylý elektr ortalyǵy keńeıtilýi múmkin
«QAZSMARTENERGO» JShS ınvestor retinde Kentaý qalasyndaǵy jylý ortalyǵy bazasynda bý-gaz stantsııasyn salýdy josparlap otyr. Bul týraly Túrkistan oblysynyń ákimi Darhan Satybaldymen kompanııa dırektorynyń orynbasary Danııar Seıtenovtiń kezdesýinde málim boldy. Qos tarap óńirde energetıka tapshylyǵyn joıý, atap aıtqanda, Kentaý qalasyndaǵy №5 jylý elektr ortalyǵyn keńeıtip, qýattylyǵyn arttyrý joldaryn talqylady.
«Kentaý qalasyndaǵy jylý elektr ortalyǵyn jańartý, keńeıtý jumystary boıynsha birneshe ınvestordan usynys túsip otyr. Biz halyqqa jáne oblysta tıimdi jobany qabyldaımyz. Joba júzege asqanda turǵyndar úshin tarıf tómen ári qoljetimdi bolýy tıis. Ekinshiden, jobany muhııat zerdelep baryp sheshim qabyldaımyz. Aldaǵy ýaqytta taǵy da kezdesip, naqtylaı túseıik. Ádil áriptestik, adal jumys bolǵany jón», - dedi Darhan Satybaldy.
Danııar Seıtenov jobany qysqasha túsindirip, kompanııa týraly málimet berdi. Elimizdiń birneshe óńirinde energetıka salasynda iri jobalardy júzege asyrǵanyn, Kentaýdaǵy jylý ortalyǵyn damytýǵa áleýet pen múmkindik jetkilikti ekenin málimdedi.
Aıta keteıik, buǵan deıin Kentaýdaǵy jylý ortalyǵy jabdyqtarynyń 85 paıyzy tozǵanyn jazǵan bolatynbyz.
Foto: Túrkistan oblysy ákimdiginiń baspasóz qyzmeti
