Kentaýdaǵy JEO-da jóndeý jumystary bastaldy
Qazir jylý energo ortalyqta jóndeý jumystary bastalyp ketken. Mundaǵy 8 qazandyqtyń 4-eýi jóndeýden ótse, qalǵan 4-eýine qaıta qurý jumystary júrgiziledi.
«Eki qazandyqtyń jóndeý jumystaryna «BI group» kompanııasy demeýshilik tanytyp otyr. Al merdiger bolyp tanylǵan «EM-Holdıng» JShS 2 qazandyqty qaıta qurýdan ótkizedi. Qazan aıynyń 20-syna deıin 2 qazandyq, al jańa jylǵa deıin qalǵan 2 qazandyqtaǵy jóndeý jumystary aıaqtalady dep josparap otyrmyz. Sondaı-aq 4 qazandyq aǵymdaǵy jóndeýden ótedi. Sonymen qysqy maýsymǵa qoryqpaı kire alamyz» - deıdi «Kentaý servıs» MKK dırektorynyń mindetin atqarýshy Baqytjan Orynbasarov.
Sonymen qatar ortalyqtaǵy jylý júıelerin jáne qosalqy qondyrǵylaryn qaıta qurý jumystary da qatar júrip jatyr. Qaladaǵy tozyǵy jetken 6,6 shaqyrym magıstraldyq jylý júıeleri men 4 keri sorǵy stantsııasy da qaıta qurýdan ótedi.
Mamandardyń sózinshe keleshekte jylý energııa ortalyǵyn gazǵa aýystyrý kózdelgen. Osyǵan oraı jetkizýshi gaz qubyrynyń qurylysyna JSQ ázirlenip, memlekettik saraptama qorytyńdysy alynǵan. Bul gaz qubyry birneshe kúrdeli máselelerdi sheshpek. Atap aıtqanda, JEO men Hantaǵy aýylyn gazben qamtamasyz etý, Indýstrıaldy aımaq, Kentaý baıytý kombınaty men Kentaý ekskovator zaýyttaryna arnaıy qosylý núkteleri qarastyrylǵan.
Mekeme basshysynyń aıtýynsha, qazir qatty jáne suıyq otynǵa bıýdjettik ótinim berilip qoıǵan.
Jalpy, Kentaýdaǵy JEO 14 000 astam abonentti jylýmen qamtamasyz etedi. Onyń ishinde 347 kópqabatty úı, 106 bıýdjettik mekeme, 401 kommertsııalyq nysan jáne 2229 jeke sektordaǵy úı bar.
Aıta keteıik, budan aldyn Kentaýdaǵy jylý ortalyǵy jabdyqtarynyń 85 paıyzy tozǵanyn jazǵan bolatynbyz.
