Kentaýdaǵy zaýyt 80 megavattyq tórt transformator jasaýǵa tapsyrys aldy
Bul jemisti eńbekti tek zaýytta ǵana emes, respýblıkalyq deńgeıdegi tarıhı jańalyq deýge negiz bar. Óıtkeni, Kentaýda qurastyrylatyn transformatordyń eń qýattysy 63 megavattyq bolatyn. Bir danasynyń ózi Kentaý sııaqty 10 qalany elektr qýatymen qamtı alady. Qazirgi ýaqytta osynaý alpaýyt transformatorǵa 4 tapsyrys túsken.
Aıte ketý kerek, Kentaý transformator zaýytynyń ujymy ótken jyly úzdik kórsetkishterge qol jetkizdi. Ónim kólemi mejelengen jospardan artyq oryndalyp, 11 mlrd teńge shaımasynda boldy.
2015 jyldyń jyrty jyldyǵynda eksport kólemi 33 paıyzǵa ósse, bıyl bul kórsetkish 40 paıyzǵa kóterilip otyr. Aldaǵy ýaqytta eksportty 50 paıyzǵa jetkizýdi josparlap otyrǵan zaýytta 1100 qala turǵyny úsh aýysymda turaqty eńbek etedi.
Osylaısha, daǵdarystan damýǵa bet alǵan zaýyt qazirdiń ózinde 2017 jyldyń qańtar aıyna deıin jetetin tapsyrystar qabyldap, kelisimsharttar jasasyp qoıǵan. Tapsyrys berýshilerdiń kópshiligi sheteldik kompanııalar. Tipti, keıbir memleketter 3 jylǵa deıin kelisimshartqa otyrǵan.
Kompanııa jaqynda ǵana Belarýs memleketinen tapsyrys aldy. Sondaı-aq, Reseı, Qyrǵyzstan, Ózbekstan jáne ózge de elderden kelip jatqan tapsyrystardyń da kólemi artyp keledi.
Jańa tehnıkamen jaraqtandyrylýǵa jáne jańa ónim shyǵarýǵa zaýyt basshylyǵy árdaıym basymdyq beredi. Zaýyt qurylǵaly beri mundaǵy tehnologııanyń barlyǵy túgelimen jańalandy. Óndiris kólemi 20 jylda 20 esege ósti.