Kentaýdaǵy aýrýhanaǵa jańa medıtsınalyq apparattar jetkizildi
«Katko» demeý korparatıvtik qory Ońtústik Koreıadan jalpy quny 92 mln teńgege zamanaýı sońǵy úlgidegi 6 birdeı qurylǵy aldyryp, óńirimizdiń ózge de aýdan qalalarynyń aýrýhanalaryna syıǵa tartty. Buǵan deıin de ıgi istiń bastamashysy bolyp kelgen qordyń bas dırektory Taǵabek Janksıev aldaǵy ýaqytta da qaıyrymdylyq sharalaryn jalǵastyra beretinderin jetkizdi.
«Jalpy elde indet bastalǵaly bizdiń mekeme qaıyrymdylyq sharalarynan shet qalǵan emes. Máselen, bizdiń tarapymyzdan Tuńǵysh Prezıdent Nursultan Nazarbaevtyń bastamasymen qurylǵan «bizbirgemiz» respýblıkalyq aktsııasy aıasynda 50 mln teńge kóleminde aqshalaı kómek berildi. Al, myna apparattardy aýrýhanalarǵa qosymsha áleýmettik kómek retinde tabystap otyrmyz. Búginde satyp alynǵan qurylǵylardy Ordabasy aýdany men Jetisaı, Kentaý qalalaryna tartý ettik. Osy qurylǵylar qaterli dertke shaldyqqan azamattardy emdep shyǵýǵa zor septigin tıgizedi degen senimdemiz», – dedi T.Janksıev.
Óz kezeginde Kentaý qalalyq ortalyq aýrýhanasy bas dárigeriniń m.ý.a. Asylbek Ýtebaev aýrýhananyń ujymy atynan, jany jomart jandarǵa óz alǵysyn bildirdi.
«Qaterli indetke qarsy kúres maqsatynda aýdanymyzda tıisti sharalar qolǵa alynyp, aýrýhanamyzǵa memlekettiń jáne demeýshilerdiń kómegimen qajetti qural-jabdyqtar jetkizilip keledi. Máselen, buǵan deıin munda 12 tynys alý apparatyn paıdalanyp kelsek, búginde aýrýhanamyz taǵy bir qosymsha apparatpen tolyǵyp otyr. Osy rette eldiń amandyǵy úshin jomarttyq tanytyp otyrǵan azamattarǵa alǵystan basqa aıtarymyz joq», – dedi A.Ýtebaev
Aıta keteıik, «Qazaqstandyq-Frantsýzdyq «Katko» birlesken kásiporny» JShS Sozaq aýdanynda 1996 jyldan beri eki ken oshaǵynda ýran óndirýmen aınalysyp keledi. Іndet kezinde kompanııa jergilikti turǵyndarǵa 10 myń dana betperde taratyp, Sholaqqorǵan aýdandyq aýrýhanasyna jedel-synaqtamalar men qorǵanys quraldaryn jetkizip berdi.
