Kentaýdaǵy órt: Túrkistan oblysynda qaýipsizdik sharalary kúsheıtilip, aýqymdy reıd bastaldy
TÚRKІSTAN. KAZINFORM — Kentaý qalasynda bolǵan órt boıynsha qylmystyq is qozǵalyp, qazirgi tańda tıisti tergeý amaldary júrgizilip jatyr.
Túrkistan oblysynyń ákimi Nuralhan Kósherov Kentaýdaǵy qaıǵyly órt oqıǵasyna baılanysty jedel shtab otyrysyn ótkizip, barlyq jaýapty uıymdarǵa aldyn alý jáne qaýipsizdik sharalaryn kúsheıtýdi mindettedi. Tótenshe jaǵdaılar qyzmetine jumysty kúsheıtý tapsyryldy.
— Óńirde órttiń aldyn alý sharalary kúsheıtildi. Merekelik kúnderi barlyq tótenshe jaǵdaılar qyzmeti kúsheıtilgen rejımde jumys istep jatyr. Ásirese halyqtyń áleýmettik osal toptary turatyn úıler, jataqhanalar men hostelderde jappaı tekserý júrgizilip, reıdter uıymdastyrylyp jatyr. Sonymen qatar gaz jabdyqtaryn qaýipsiz paıdalanýdy baqylaýǵa jaýapty ınspektsııanyń jumysy jandandyryldy. Halyq arasynda qaýipsizdik erejelerin saqtaý boıynsha túsindirý jumystary jalǵasyp jatyr, — delingen oblys ákimdigi taratqan aqparatta.
Aımaq basshysy Kentaýdaǵy oqıǵa ornyna arnaıy baryp, jaýapty qyzmet ókilderimen jedel keńes ótkizdi. Oblys ákimi jaǵdaıdy jeke baqylaýyna alyp, jedel shtab quryldy.
Aıta keteıik, búgin túnde Túrkistan oblysynyń Kentaý qalasynda kópqabatty turǵyn úıdiń birinshi qabatynda ornalasqan qoǵamdyq tamaqtaný ornynda gaz-aýa qospasynyń jarylysy saldarynan órt shyqty. Oqıǵa ornyna jedel jetken órt sóndirý bólimsheleri tilsiz jaýdy qysqa ýaqyt ishinde tolyqtaı aýyzdyqtady.
Ókinishke qaraı, oqıǵa saldarynan 18 jastaǵy azamat kóz jumdy. 4 adam ártúrli dene jaraqatymen aýrýhanaǵa jetkizildi. Olardyń ekeýiniń jaǵdaıy aýyr, jansaqtaý bóliminde jatyr. Zardap shekkender tolyq medıtsınalyq baqylaýda.
Budan buryn Kentaýda gaz jarylysynan 1 adam qaza taýyp, 4 adam aýrýhanaǵa jetkizilgenin jazǵan edik.
